O Ministerio de Industria, Comercio e Turismo convocou axudas por valor de cinco millóns de euros destinadas á transformación dixital e modernización de entidades locais integradas na Rede de Destinos Turísticos Intelixentes que forman parte do Camiño de Santiago nos seus diferentes tramos, co obxectivo de contribuír a unha mellora na atención e experiencia do peregrino na súa travesía.
Con estas axudas complétase o despregamento do Plan Nacional Turístico Xacobeo 2021-22, un programa valorado en 121 millóns de euros para a revitalización desta ruta milenaria.
"Con iso estamos a rehabilitar patrimonio histórico do Camiño, mellorando a sustentabilidade e enriquecendo a oferta turística dos destinos Xacobeo, e agora tamén, impulsando o uso de tecnoloxías innovadoras para que os municipios do Camiño gañen competitividade e sigan atopando na actividade turística unha fonte de emprego e riqueza, que lles axude a fixar poboación", explicou o secretario de Estado de Turismo, Fernando Valdés.
A orde de bases que regula estas axudas, que se publicou este xoves no Boletín Oficial do Estado (BOE), establece como posibles beneficiarios as agrupacións de entidades locais (compostas por un mínimo de tres entidades e un máximo de oito) que pertenzan á mesma ruta do Camiño de Santiago e presenten proxectos para resolver necesidades comúns relacionados coa ruta Xacobea.
O prazo para presentar solicitudes abrirase polo período dun mes a partir da publicación no Boletín Oficial do Estado
Os solicitantes deberán ser membros da Rede de Destinos Turísticos Intelixentes ou solicitar a súa adhesión antes da concesión da axuda.
AXUDAS DE ATA 1 MILLÓN DE EUROS. Os beneficiarios poderán optar a subvencións de entre 500.000 e un millón de euros para financiar actuacións como plans estratéxicos relacionados coa transformación dixital, modernización e transformación dixital na xestión do destino, actuacións de calidade, actuacións de emprendemento, así como outras actuacións con potencial impacto positivo no Camiño e na experiencia peregrina.
O prazo para presentar solicitudes abrirase polo período dun mes a partir da publicación no Boletín Oficial do Estado do extracto da convocatoria regulada por esta orde de bases.
