A cidade de Pontevedra é a primeira parada da exposición Carteis para un Camiño. 100 anos de ilustración Xacobea, unha mostra itinerante sobre o Xacobeo que percorrerá nove comunidades autónomas españolas.
Esta exposición, que foi inaugurada este martes, recompila reproducións de carteis, folletos e programas de festas do século XX para coñecer as tradicións que conflúen no Camiño de Santiago e na iconografía xacobea neste período.
A mostra poderá visitarse en Pontevedra ata 30 de outubro e logo pasará por Tineo (Asturias), Laredo (Cantabria), Sangüesa (Navarra), Jaca (Aragón), León (Castela e León), Mérida (Estremadura), Sevilla (Andalucía), Cuenca (Castela-A Mancha), e Nájera (A Rioxa).
O vicepresidente da Xunta de Galicia, Alfonso Rueda, subliñou na inauguración o "reclamo" que supoñen para Galicia as rutas xacobeas e o "fenómeno" internacional do Ano Santo compostelán como "motor" da recuperación do sector turístico.
A este respecto, Rueda destacou a "importancia" da colaboración entre Xunta de Galicia, o Goberno central e as comunidades que atravesa o Camiño de Santiago, especialmente de cara ao ano 2022, no que espera que "despegue" o turismo internacional.
No acto de inauguración tamén participaron o alcalde de Pontevedra, Miguel Anxo Fernández Lores, e a directora xeral de Industrias Culturais, Propiedade Intelectual e Cooperación do Ministerio de Cultura e Deporte, Adriana Moscoso do Prado Hernández.
