El tiempo
miércoles. 05.10.2022
El tiempo

Trece nenos italianos con autismo e as súas familias fan o Camiño Francés

Parte de la expedición, comiendo tras su llegada a Sarria. D. CENDÁN
Parte de la expedición, comiendo tras su llegada a Sarria. D. CENDÁN
A peregrinación, que partiu de Sarria, conta co apoio da Garda Civil e un carabinieri

A expedición CamminAutismo a Santiago 2022 iniciou o martes pola mañá na estación de tren de Sarria, a súa peregrinación, na que 13 nenos italianos con autismo farán a ruta ata Compostela acompañados das súas familias, monitores e catro integrantes de Mediaset Italia.

"Teremos o apoio da Garda Civil durante todo o percorrido, con varias patrullas, ademais dun carabinieri italiano, que vai facer o Camiño co grupo", explicou a organización.

"A Garda Civil tamén habilitou unha web con todos os centros sanitarios e lugares de interese para ter a información a man en caso de ser necesaria, xa que os nenos necesitan atención se pasa calquera imprevisto", engadiu, agradecendo as facilidades e o trato que recibiron por parte das autoridades. Ademais, colabora a Asociación de Amigos do Camiño de Santiago na Comarca de Sarria, que preside Jorge López.

A atención xa empezou antes da súa chegada a Sarria, coa recollida no aeroporto de Santiago, o traslado ata o punto do inicio do percorrido, o apoio aos nenos e a distribución en aloxamentos dunha expedición formada en total por 41 persoas.

E é que os menores tamén necesitan asistencia durante o traxecto, por exemplo, para cruzar estradas e carreiros nos que haxa tráfico ou dificultades de paso, contando para iso co "carabinieri, 20 unidades do Grupo de Reserva e Seguridade da Garda Civil (GRS) e dous xinetes deste mesmo corpo, que acompañan ao grupo".

A ruta elixida é a do Camiño Francés desde Sarria, debido a ser unha opción curta e alcanzable, ademais de emblemática.

Esta iniciativa axuda así a visibilizar ás persoas con autismo e supón unha experiencia moi enriquecedora para os nenos, que afrontarán situacións completamente novas para eles e desenvolverán e perfeccionarán habilidades, ademais de gozar dos beneficios de camiñar por contornas naturais.

Para organizar esta actividade, a asociación falou, en primeira instancia, coa Garda Civil. "Desde aí, antes de aceptar ou rexeitar o servizo de axuda, comprobaron a fiabilidade da asociación póndose en contacto cunha oficina de enlace cos carabinieri de Italia, para confirmar varios aspectos sobre a asociación". Logo das comprobacións pertinentes empezaron a trazar un plan para que a peregrinación sexa todo un éxito.

PRIMEIRA ETAPA. A expedición chegou este martes ao mediodía a Portomarín, dando así por acabada a primeira etapa da ruta desde Sarria. Este día inicial serviu como toma de contacto dos nenos coa contorna que lles acompañará durante os días que dure finalmente o seu Camiño. Non se marcan unha data fixa de chegada a Compostela, senón que irán adaptando a peregrinación ás súas necesidades.

Trece nenos italianos con autismo e as súas familias fan o Camiño...
comentarios