O secretario xeral de Política Lingüística da Xunta, Valentín García, confiou en que "en datas próximas" se anuncie unha nova convocatoria do fondo de proxectos culturais Xacobeo 2021 e asegurou que se recibiron "reiteradas solicitudes" para que se realizase unha nova edición.
En resposta a unha pregunta do deputado popular Borja Verea na Comisión de Educación e Cultura do Parlamento de Galicia, Valentín García fixo un balance positivo da primeira convocatoria deste programa que buscaba adquirir e promover proxectos culturais en galego e que foi lanzado a pasada primavera no marco do plan de reactivación económica.
Ademais, destacou que esta iniciativa aspiraba a permitir o acceso da cidadanía a produtos culturais financiados con diñeiro público, así como a dinamizar a lingua galega, apoiar a artistas e creadores e visibilizar a oferta e o "potencial" do sector.
García precisou que a convocatoria, que permitiu apoiar máis de 350 iniciativas, estivo dirixida a proxectos audiovisuais, que representaron o 43% do total; e á produción editorial, que supuxo o 35% dos traballos.
Así mesmo, o secretario xeral indicou que se abriu a porta á adquisición de guías e documentais de promoción turística realizados en galego, ademais de en outros idiomas, e que supuxeron o 22% das propostas aceptadas.
INVERSIÓN. En concreto, recordou que o fondo foi dotado inicialmente con 1,5 millóns de euros, pero que a contía se incrementou ata
Valentín García explicou que a convocatoria estivo aberta á participación de autonómos, que podían optar a un financiamento máximo de 4.000 euros, e de empresas, cooperativas e entidades sen ánimo de lucro con traballadores, que podían percibir ata 10.000 euros. Tras recibir as solicitudes e avalialas, a Xunta comunicou os produtos que podían ser comprados e os traballos facturáronse unha vez entregados.
Mentres, puxo en valor que levasen a cabo 424 actuacións presenciais, 36 delas en Santiago, "en tempo de semiconfinamiento" e destacou o labor realizado pola Xunta para conseguir que algúns concellos non cancelasen os eventos dada a situación e permitisen a súa celebración con medidas de seguridade. Así, tiveron lugar 240 actuacións teatrais e 119 concertos, ademais de 65 actividades de dinamización da lingua galega dirixidas a escolares.