O bus coruñés vai á folga e denuncia que os servizos mínimos son abusivos

Os traballadores da Compañía de Tranvías da Coruña, que xestiona o servizo de autobús urbano, teñen este venres a súa primeira xornada de folga na que denuncian uns servizos mínimos abusivos por alcanzar o máximo que permite a lei. O presidente do comité de empresa da compañía, Alberto Couselo, insistiu este xoves, en declaracións a EFE, nas convocatorias de folga para este venres e o vindeiro venres, 29 de maio.

O que pretenden os empregados con esta medida "é poder traballar tranquilos e ter a seguridade de que os postos de traballo están asegurados cunha serie de cláusulas que son gratuítas", e que, segundo eles, a empresa non acepta. Por iso convocan dúas xornadas de folga para 248 traballadores -212 condutores-, aínda que seguirán as iniciativas ata que se acepten as súas pretensións, coas que buscan ter en 2018 as condicións que teñen en Vigo desde 2013.

Neste sentido, piden traballar as 1.755 horas ao ano que fan en Vigo e non as 1.810 actuais da Coruña, que se achegan moito ao máximo legal, situado en 1.826. Couselo detalla que aos traballadores "sorpréndelles" o feito de que "non se puxeron en contacto nin o Concello nin a empresa" con eles para comentar "os horarios dos servizos mínimos". "Parécenos unha falta de respecto para os traballadores e usuarios. Impuxeron por decreto os servizos mínimos máximos, do cincuenta por cento", engade.

Entre as súas peticións, ademais de baixar lixeiramente a carga de traballo, está a "subrogación" se os seus postos pasan a pertencer a outra empresa e a garantía de que non haberá externalizacións. A Compañía de Tranvías opina sobre a folga que busca "orquestrar" un conflito que na actualidade non existe, aínda que os traballadores subliñan que se 95 compañeiros apoian a postura en asemblea é porque "existe conflito".

A empresa engade, a través dun comunicado, que os servizos mínimos fixados no máximo legal marcounos o Concello e a compañía aplícaos cuns horarios que reflicten no seu portal de internet. Considera que a folga é "inxustificada", "incoherente", "irresponsable" e "inxusta" e subliña como está agora "o mercado laboral".