A catedral de Santiago foi testemuña este martes da presentación do proxecto 3Caminos, que se converterá na primeira serie de ficción internacional e transmedia que vira en torno ao Camiño de Santiago e ás vivencias "emocionais" ao redor da peregrinación. Na presentación participou o conselleiro de Cultura, Román Rodríguez, que estivo acompañado do director da Agadic, Jacobo Sutil, os autores da idea orixinal, Mamen Quintas e Julio Casal, e o realizador galego Norberto López Amado, que codirixirá a serie co alemán Grego Schnitzler.
A maiores, tamén estiveron presentes os representantes dos socios internacionais deste proxecto, Ricardo Carbonero, de Amazon Prime Vídeo en España, e Christian Cockel, do grupo alemán Beta Films.
3Caminos, que iniciará en breve a súa andaina coa idea de estar lista antes de 2021 da man da empresa compostelá Fucción Producións, narra as vivencias compartidas ao longo de tempo por cinco mozos peregrinos doutros tantos países. A idea resultou gañadora dunha subvención de 1,5 millóns de euros por parte da Xunta como adxudicataria do concurso convocado para a creación dun audiovisual que difunda os valores do Camiño de cara ao Xacobeo 21.
Participarán máis de medio centenar de profesionais do sector audiovisual, así como actores galegos
DISTRIBUCIÓN INTERNACIONAL. Durante a presentación, Román Rodríguez recordou que grazas ás distribuidoras dos socios internacionais maioritarios, a cita chegará a 200 países, e precisou que tamén contará con coproductores en Italia, Corea do Sur, México e Chile. Esta ficción, destacou, será unha "excelente plataforma" para o talento galego, xa que nela participarán máis de medio centenar de profesionais do sector audiovisual, así como actores galegos, confirmaron os seus responsables, aínda que aínda se están cadrando axendas.
De feito, a gravación desta serie comezará en novembro deste ano e durará uns oito meses, trasladándose, ademais da distintos puntos de España, a Alemaña, Corea do Sur, Francia e México, países de orixe dos protagonistas. Ao mesmo tempo, a obra non será "lineal", se non que sucederá en tres momentos temporais distintos e estará rodada en seis idiomas.
