O presidente da Xunta, Alberto Núñez Feijóo, asegurou este mércores que o contrato para a organización do festival O Son do Camiño, que esgotou os seus 20.000 abonos en menos de dúas horas, cumpre "escrupulosamente" coa lexislación de patrocinio, que foi a fórmula empregada.
O festival que se celebrará en Santiago de Compostela entre o 28 e o 30 de xuño e co que a Xunta promocionará este ano o Xacobeo 2021 vendeu este xoves "20.000 abonos nunha hora" polo que "quedan 5.000 ou 6.000" para a súa venda en despacho de billetes, incidiu.
Do total de entradas vendidas, explicou Núñez Feijóo, o 90% corresponden a españois dos que o 55% son galegos e o 45% doutras comunidades.
Deste xeito, Núñez Feijóo defendeu a calidade do evento, "se se venden nunha hora é que o concerto pode ser interesante" e "debe ser que o festival tivo eco na mocidade e na xente que quere ver a eses grupos".
Entre outros, están previstas as actuacións de artistas internacionais como The Killers, Jamiroquai, Franz Ferdinand, Lenny Kravitz e tamén de bandas galegas como Eladio e os seres queridos, Melandrómeda ou Triángulo de Amor Bizarro, entre outras.
Núñez Feijóo defendeu tamén a validez do proceso de posta en marcha da contratación do evento e asegurou que se "tivésemos dúbida de que se fixo mal deixariámolo sen efecto".
Explicou pois que o que fixo a Xunta foi "algo tan elemental e común como un patrocinio a un festival a risco e ventura" da súa acollida.
Segundo explicou, os promotores presentaron a proposta á Xunta e a mesma recibiu "o visto e place do Xacobeo para patrocinala" polo que non é a impulsora directa.
Por iso, animou a outras empresas a actuar de forma similar. "Vai haber máis cousas, máis actos" polo que os "que teñen distintas propostas pódenas presentar".
Ademais, reiterou que lle gustaría que, como foi o caso do citado festival, "todos os actos patrocinados" pola Xunta "se venderan nunha hora".
Os grupos da oposición e a asociación galega de empresas musicais criticaron a concesión dun contrato de 3 millóns de euros a unha UTE formada por dúas empresas para a celebración deste macroconcerto e puxeron en dúbida o procedemento elixido.
