Madonna publicou este mércores un vídeo no que avanza o que será o seu próximo disco de estudo, cuxo lanzamento está previsto para este ano e no que serán protagonistas a música e estética de Lisboa, cidade na que reside desde 2017.
A raíña do pop, de 60 anos, publicou o avance na súa conta de Instagram, na que se pode ver á artista, agora cunha melena curta e negra, en ambientes underground da capital portuguesa.
Rodeada de músicos que tocan sones caboverdianos e noutras imaxes cos acordes de guitarras portuguesas, entoa a frase Express Yourself, Don't Repress Yourself (Exprésate, non te reprimas), un xogo de palabras que remite a uns dos seus temas de maior éxito, Express Yourself, lanzado en 1989.
"Moi emocionada por compartir a maxia de Lisboa", escribe a cantante na publicación, que supera xa as 300.000 vistas e os 2.900 comentarios e na que non dá detalles do que será o seu próximo álbum.
É unha proba da expectación polo que será o décimo cuarto disco da súa carreira logo de Rebel Heart, que chegou ás tendas en 2015, e o primeiro desde que trasladou a súa residencia a Portugal, a finais de 2017.
Do contido do disco pouco se sabe, aínda que Madonna foi desvelando nos últimos meses a súa amizade con algúns fadistas e outros músicos portugueses, cuxa sonoridad sentirá previsiblemente no seu próximo traballo.
A artista trasladouse a Portugal para que un dos seus fillos adestrase co equipo de fútbol do Benfica, e é unha das estrelas que se instalou nos últimos tempos en Lisboa, onde teñen casa Monica Bellucci e Michael Fassbender, entre outros.
