A concursante galega de Operación Triunfo 2018, Sabela Ramil, mostrou o seu rexeitamento á violencia de xénero interpretando, dentro da academia, a canción Matriarcas, de Guadi Galego.
A pontesa publicou o vídeo nas redes sociais, onde traduciu ao castelán un anaco da letra da canción e explicou o que sentía ao cantala. "Matriarcas, un tema de Guadi Galego que me fai sentir preto da miña terra pero, sobre todo, preto de todas vós que hoxe estades a avanzar un paso máis e reivindicando a inxustiza social que supón a violencia de xénero", escribiu a concursante de OT no seu Instagram.
Sabela acompañou o post cun reivindicativo "25-N. Non son mortes, son asasinatos" e tamén cun verso do himno desta edición de OT: "Somos aire e emoción, somos a revolución".
O vídeo, publicado este luns, supera xa as 65.500 reproducións.
É habitual que Sabela cante ou fale en galego dentro da academia. Na gala 2, xogouse a súa continuidade no programa co tema Benditas feridas, a semana pasada recoñeceu que botaba de menos falar no seu idioma natal e incluso ensinou aos seus compañeiros algunhas palabras e expresións en galego.