O Encontro Mundial de Humorismo (EMHU) volve á Coruña na súa segunda edición entre o 2 e o 10 de maio con 80 artistas nacionais e internacionais entre os que se atopan Leo Harlem, David Broncano, Silvia Abril ou Javier Cansado.
Co apoio do Concello da Coruña, o EMHU 2020 renderá homenaxe ás grandes figuras da Historia do Humor como Castelao, Cunqueiro ou Camba, entre outros, informou a organización nun comunicado.
Os cómicos David Broncano, Ignatius e Quequé ofrecerán o espectáculo La Vida Moderna Live Show no Coliseum e será unha das súas poucas actuacións en España en 2020.
Ademais, o show Humoris Causa, que ofrecerá a estrea mundial en exclusiva do primeiro monólogo do humorista, presentador e locutor Javier Cansado, só se poderá ver en EMHU 2020 e contará coa presenza de Leo Harlem, Ana Morgade e Carlos Blanco.
Así mesmo, o público poderá gozar do novo show de Pantomima Full En su cabeza era espectacular con Rober Bodegas e Alberto Casado.
A programación contará tamén co late night cultural, político e feminista Deforme Semanal con Isa Calderón e Lucía Lijtmaer; o Ultrashow de Miguel Noguera; e o infantil Diario de una Pulga, de Piedrahita, quen porá texto á famosa peza musical O Entroido dos Animais de Camille Saint-Saëns, co acompañamento da Orquestra Infantil da Sinfónica de Galicia.
A presenza internacional virá da man de Agustín Aristarán (Son Rada), o polifacético artista arxentino que triunfa en toda Latinoamérica cos seus espectáculos de comedia e programas de televisión, que visitará por primeira vez España co seu espectáculo de humor Into the World.
Como broche final, o festival terminará con outro dos seus exclusivos espectáculos que non poderá verse fóra do EMHU: o Fantastic Colofon, que xuntará por primeira vez nun escenario a Silvia Abril, Xosé A. Touriñán e Luís Piedrahita.
Será nesa gala final cando se realizará a entrega de Premios EMHU, que traerá á urbe a alfombra vermella do humor.
Esta iniciativa, con Luís Piedrahita como director artístico e a produtoras Etiqueta Negra e O Espectador como creadores, atraeu na súa primeira edición 10.000 asistentes de todo o territorio nacional e doutros países como Arxentina ou Suíza.
O EMHU 2020, coa colaboración do Concello da Coruña a través do Consorcio de Turismo e da Concellería de Cultura -que apostaron por este festival como un dos grandes fitos culturais do ano-, ademais da activa participación da Fundación Wenceslao Fernández Flórez e a Casa Museo Álvaro Cunqueiro, pretende ser un dinamizador cultural para toda a cidade.
Por iso, celebrarase en emprazamentos crave: Teatro Colón, Coliseum, Palacio da Ópera, Edificio Afundación, Xardíns de Méndez Núñez e a Sala de Exposicións Salvador Madariaga.
