Betfair considera válido o gol de Messi e abona o triunfo do Barcelona en Mestalla

A casa de apostas Betfair deu por válido o gol do arxentino Leo Messi, que o colexiado non autorizou no partido contra o Valencia (1-1), e ingresará os beneficios dos usuarios que apostaron por un triunfo do conxunto catalán en Mestalla. Nun comunicado, a casa de apostas confirmou que considera legal o tanto do arxentino, que debería subir no marcador xa que o balón, que se lle escapara a Neto, superou a liña de gol.

"Betfair, nun xesto de boa vontade e de xustiza cos seus clientes, non só abonará os beneficios a aqueles que apostaron polo empate, senón que tamén recibirán o seu premio os que apostaron pola vitoria do Barcelona", reza o comunicado.

A casa de apostas tamén abonará o premio correspondente a todos os usuarios que apostaron que Messi sería o primeiro goleador do partido e que anotaría en calquera momento do encontro, mentres que tamén aceptará as apostas que confiaban en Rodrigo como primeiro anotador.