O Celta de Vigo anunciou este domingo, a través dun comunicado de prensa, a destitución do adestrador portugués Miguel Cardoso e que Fran Escribá será o seu substituto, logo da derrota do seu equipo ante o Eibar (1-0) en Ipurúa.
O técnico luso, que empezara a tempada no Nantes, onde tamén foi destituído, substituíu o arxentino Antonio Mohamed o pasado 12 de novembro. Na súa etapa en Balaídos asinou os peores números dun adestrador celeste desde o último ascenso, cunha soa vitoria nas últimas once xornadas, nas que sumou 5 puntos.
"Miguel Cardoso e o seu corpo técnico non continuarán no RC Celta unha vez acordada a súa desvinculación da entidade. O Celta quere expresarlle o seu agradecemento, tanto ao adestrador luso como aos seus axudantes Jorge Maciel, Antonio Calado, Nuno Baptista e Francisco Costa pola profesionalidade, dedicación e esforzo que demostraron durante a súa estancia no RC Celta", sinala a entidade que preside Carlos Mouriño no seu comunicado.
Pola súa banda Fran Escribá, ex-adestrador de Elxe, Xetafe e Vilarreal en primeira, chegará a Vigo nas próximas horas para asinar polo que queda de tempada
