A Fiscalía solicitou reabrir a investigación do transplante de fígado do exxogador do FC Barcelona e actual secretario técnico do club, Eric Abidal, tras presentar un escrito no xulgado de instrución 28 de Barcelona.
Nun comunicado, a Fiscalía detallou que o 20 de xullo presentou o escrito para "esclarecer as diferenzas achadas ata a data na distinta documentación" da causa.
Tamén sinalou que busca "determinar con exactitude a identidade do doante", que segundo o xogador foi un curmán seu residente en Francia chamado Gerard.
PRESUNTA COMPRA. O caso, que investigaba a presunta compra dun fígado para Abidal por parte do entón presidente do club, Sandro Rosell, foi arquivado polo xuíz no principio do ano.
O Xulgado de Instrución 28 de Barcelona recibiu unha inhibición por parte da Audiencia Nacional en relación ao caso e as súas investigacións "non permitiron definir nin ilícito penal nin o suposto autor ou autores", polo que se arquivou, aínda que agora Fiscalía solicita reabrilo.
O transplante de Abidal realizouse en 2012 pola vía pública no Hospital Clínic de Barcelona, aínda que a recuperación levouse a cabo nas instalacións privadas do hospital, no BarnaClinic.