A Fifa desestima a reclamación de 300.000€ de Roderick ao Deportivo

A Cámara de Resolución de Disputas da FIFA desestimou a reclamación por un importe próximo a 300.000 euros que presentara o central portugués Roderick Miranda contra o RC Deportivo, club no que militou na tempada 2012-13.

O club coruñés informa nun comunicado que o órgano da FIFA, na súa reunión celebrada en Zúric (Suíza), o pasado 26 de novembro, acordou con relación á disputa laboral derivada da reclamación do futbolista Roderick Miranda, considerar "a demanda como inadmisible".

O Deportivo sinala que a FIFA "estima integramente as alegacións" do club, que non se verá obrigado a abonar unha contía aproximada de 300.000 euros.

O club defendeu ante a FIFA que Roderick non había comunicado nin á Administración concursal nin ao Deportivo, que entón se atopaba en concurso de acredores, a débeda de 213.750 euros netos que posteriormente reclamou no organismo internacional.

O Deportivo esgrimía que a solicitude de Roderick non se produciu dentro dos momentos procesuais que, de conformidade coa lexislación concursal española, habilítanse a tales efectos no marco do concurso de acredores.

Ao non figurar na lista concursal de acredores, o Deportivo non tiña constancia nin recoñecemento algún da suposta débeda.

En consecuencia, o club defendeu que non correspondía efectuar o seu abono xa que, ademais, o pago da suposta débeda reclamada polo xogador a través da FIFA implicaría graves responsabilidades para o Deportivo, xa que produciría automaticamente unha desigualdade de trato e un desequilibro entre o resto de créditos si comunicados dentro do concurso.

O Deportivo entendía que, se se aceptaba a reclamación de Roderick, prexudicaríase aos acredores con créditos recoñecidos no marco do concurso que tiveron que asumir unha quita e unha espera aprobadas xudicialmente.