O pentacampeón mundial de MotoGP, Marc Márquez, celebrará este sábado en Cervera (Lleida) o seu novo título "á marxe de calquera iniciativa política", segundo o seu representante, e por segundo ano non sairá ao balcón do Concello, onde hai unha pancarta a favor dos independentistas presos.
En declaracións a Efe, o representante de Márquez, Emili Alzamora, recordou que o ano pasado o piloto acudiu a unha recepción no Concello, aínda que non subiu ao balcón consistorial, polo que non é algo novo nin excepcional nas súas celebracións que este ano tampouco o faga.
O alcalde de Cervera, Ramon Royes, asegurou a Efe que, durante as reunións previas ao acto de celebración deste sábado, os representantes do piloto pedíronlle que se retirase a pancarta de apoio aos políticos cataláns presos para que este puidese saír a saudar ao balcón.
"Centrarémonos só no estritamente deportivo e no alcance histórico do novo título"
Segundo o diario Segre, detrás desa petición estaría o Fan Club de Marc Márquez, o organizador dos festexos, que atendería deste xeito as esixencias das grandes firmas que patrocinan ao piloto.
Royes dixo que o consistorio non vai acceder a esta demanda: "Igual que eu respecto a decisión de Marc Márquez, pido que se respecte a miña", subliñou.
O alcalde considera que a pancarta reflexa un "momento extremo" e mostra un "claro apoio á defensa dos dereitos democráticos que non se están cumprindo neste país" e que, por este motivo, non se expón a súa retirada.
Pola súa banda, Emili Alzamora insistiu en que o piloto se mantén á marxe desta polémica e que "o único que Marc desexa, como sempre, é celebrar o seu novo título cos afeccionados, sen entrar en cuestións políticas. Centrarémonos só no estritamente deportivo e no alcance histórico do novo título".
Así mesmo Royes asegurou que non quere "alimentar ningunha polémica" e que, igual que o ano pasado, Márquez poderá baixar, cando finalice a recepción institucional, ata a porta do Concello para, desde a praza, saudar aos afeccionados e os veciños do pobo e facerse fotos con eles.