O consello do Sporting de Xixón non irá a Balaídos

O consello de administración do Sporting non acudirá ao palco do estadio do Celta de Vigo nin participará en ningún acto protocolario con motivo do partido que enfrontará o vindeiro sábado a ambos os equipos, como mostra de solidariedade coa afección branquivermella á que o club vigués non venderá entradas.

Así o anunciou o club xixonés a través dun comunicado feito público na súa páxina web e no que se recollen todas as negociacións que tratou de manter co Celta de Vigo para lograr o maior número posible de localidades ante a gran demanda existente por parte das penas branquivermellas.

Segundo este comunicado, o Sporting dirixiuse ao Celta o pasado 30 de setembro preguntando sobre a dispoñibilidade de entradas para o partido entre os dous equipos, "non sendo respondido ata o 13 de outubro, no que se manifestou que serían unhas 300 localidades sen facer alusión ao prezo, localización ou limitación algún respecto ao resto do estadio". 

O club asturiano engade que "desde ese momento foron múltiples os intentos de acordar unha solución ao obxecto de satisfacer na medida do posible a demanda dos afeccionados do Sporting, non sendo ata o pasado 18 de novembro cando se recibe un correo no que se reduce aínda máis o numero de entradas a 200 localidades". O Celta daba ao Sporting catro días, dous deles festivos, para identificar ás 200 persoas que asistirían con esas localidades e advertindo que "o resto do campo ofertarase só a afeccionados do Real Club Celta".

O Sporting asegura "ser perfectamente coñecedor da normativa aplicable para a venda de localidades, pero precisamente por non contar o Celta de Vigo cunha zona acoutada para a afección visitante como obriga a normativa e ante a gran demanda da afección é polo que se decidiu renunciar á recepción desas 200 localidades ao obxecto de que fose o Celta o que adoptase as medidas correspondentes para que os afeccionados do Sporting gozasen do partido sen ningunha restrición de acceso".

Ante a decisión do consello de administración do Celta de non vender localidades á afección do Sporting, desde o club xixonés advírtese que "dita prohibición pode supor unha vulneración do artigo 14 da Constitución Española e do artigo 2.2 da Lei contra a Violencia, o Racismo, a Xenofobia e a Intolerancia no Deporte". O consello de administración do Sporting asegura que deixará "constancia ante as instancias oportunas entendendo que tal vulneración supón un veto e unha discriminación manifesta cara á afección do Sporting".

Por eses motivos os conselleiros non acudirán ao palco nin participarán en acto protocolario algún e finalizan o comunicado anunciando: "De cara ao partido de volta, a afección do Celta de Vigo será recibida como a afección señorial que é dispoñendo das entradas que precisen na medida da nosa dispoñibilidade e coa calor e o agarimo que sempre foi recibida en Xixón".

A Federación de Peñas Sportinguistas anunciou este martes por boca do seu presidente, José María Suárez Braña, que emprenderá medidas legais contra o Celta de Vigo e no seu caso contra a liga de Fútbol Profesional no caso de que finalmente non se vendan localidades aos afeccionados xixoneses.