Os xogadores do Rio Natura Monbus Obradoiro xogaron este mércores un torneo na rúa en plena Alameda da capital galega, onde compartiron a tarde con numerosos afeccionados.
O club compostelán anunciou apenas unhas horas antes este acto sorpresa nun dos parques máis céntricos e concorridos de Santiago, un segredo que se desvelou este mércores pasadas as 18 horas.
Os xogadores do primeiro equipo apareceron vestidos de curto e, ás ordes do corpo técnico, disputaron un rechamante e emocionante torneo rueiro no que fixeron as delicias do público, que apreciou a iniciativa.
Nunha canastra instalada na Alameda e cunha serie de partidos a media cancha en formato de 'rei da pista' –quen gana segue xogando– os homes demostraron o extraordinario nivel de baloncesto que ten a Liga Endesa.
Foi unha auténtica sorpresa para as numerosas persoas que, cada tarde, acoden a este parque, moitos turistas, e que este mércores viu unha das súas xornadas máis emocionantes na que o bo tempo acompañou.
MONCHO, DE ÁRBITRO. Os árbitros foron Moncho Fernández, Víctor Pérez e Gonzalo Rodríguez Palmeiros, os tres adestradores do corpo técnico do conxunto compostelán.
Todos os presentes participaron nunha fotografía de familia con 'As Marías', a popular estatua en honra a dúas veciñas de Santiago xa falecidas e, ademais, o club regalou entradas para o partido de presentación do primeiro domingo de outubro no Fontes do Sar ante o Porto.
Ao espectáculo na pista acompañouno o trofeo da Copa do Rei, unha competición na que debutará en febreiro de 2016 o Rio Natura Monbus Obradoiro como anfitrión na Coruña.
O público puido fotografarse primeiro co trofeo e despois cos xogadores, aos que os presentes pediron autógrafos e cos que compartiron impresións dúas semanas antes do inicio da liga Endesa.
