O pivote español Pau Gasol chegou a un acordo cos Spurs de San Antonio para comprar o seu contrato e fichar polos Bucks de Milwaukee, segundo informou este venres a cadea de televisión ESPN. Os xogadores deben ser dados de baixa polos equipos antes das 17:00 hora do Leste de Estados Unidos para que poidan participar nos playoffs se son contratados por clubs que os disputen.
Gasol, de 38 anos, viu diminuír o seu papel cos Spurs esta tempada, en parte debido a que se perdeu 26 partidos por unha fractura por tensión no pé esquerdo, pero tamén porque o adestrador Gregg Popovich, que está nun novo proceso de reconstrución do equipo, xa non conta con el.
Popovich preferiu ao mozo austríaco Jakob Poeltl, de 23 anos, que entrou no traspaso que os Spurs pecharon cos Raptors de Toronto polo aleiro Kawhi Leonard.
O maior dos irmáns Gasol ten garantidos 6,7 millóns de dólares do seu salario dos 16 millóns que tería que recibir na tempada 2019-2020, o mesmo que vai cobrar na presente. O acordo podería ser, segundo a ESPN, que Gasol recibise a metade do diñeiro garantido para que poida ter a opción de xogar cun equipo que conta coa mellor marca da liga e está entre os favoritos a loitar polo título.
Gasol está a ter as medias máis baixas desde que chegou á NBA con 4,2 puntos e 4,7 rebotes en 12,2 minutos por partido. Nos 18 anos que leva na NBA, conseguiu dous títulos de liga con Los Ángeles Lakers e ten medias de 17,1 puntos e 9,2 rebotes, ademais de ser nomeado Novato do Ano en 2002, seleccionado seis veces para o Partido das Estrelas, dúas veces para o segundo mellor equipo da NBA e outras dúas veces para o terceiro.
