A Conmebol anunciou este martes que o partido de volta da final da Copa Libertadores xogarase o 8 ou 9 de decembro fóra de Arxentina e, de inmediato, polo menos cinco países apareceron como opcións, pese ao rexeitamento taxativo da Boca Juniors e a ameaza dos seus directivos de levar o caso ao TAS.
A confirmación do lugar no que se disputará o partido coñeceuse este xoves: o Santiago Bernabéu. O estadio do Real Madrid converterase no centro das miradas dos arxentinos a próxima semana.
O presidente da Boca Juniors, Daniel Angelici, pediu á Conmebol que o partido non se xogase, que o River Plate fora desclasificado e, xa que logo, que o título fora adxudicado ao seu club. "A violencia non é parte do fútbol, isto resólvese con goles", afirmou o presidente da Confederación Suramericana de Fútbol (Conmebol), o paraguaio Alejandro Domínguez, tras a reunión cos directivos de River Plate e Boca Juniors para definir as solucións ao desenlace da Copa Libertadores.
A Conmebol descartou que se xogue en Arxentina o partido de volta polo título da Libertadores, que debeu cancelarse o sábado pasado polo ataque de fanáticos ao autobús que conducía ao persoal da Boca Juniors ao estadio Monumental de River Plate. A entidade considerou que o país non cumpre coas condicións de seguridade para acollelo.
