Tino Fernández foi reelixido, case por unanimidade, presidente do RC Deportivo ata 2023 nunha Xunta Xeral Extraordinaria de Accionistas que se celebrou este xoves e cuxa convocatoria foi impugnada no Xulgado polo exdirixente da Federación de Peñas Miguel Otero.
Fernández non tivo oposición, xa que Otero, que se lanzou como candidato dirixir o club, non recolleu accións para intentar arrebatarlle a presidencia á espera do que decida o Xulgado do Mercantil número 2 da Coruña, que admitiu a trámite a súa demanda contra a convocatoria da Xunta.
O aspirante a presidir o Deportivo, que acudiu á Asemblea como accionista e seguiu a Xunta desde unha das primeiras filas, considera que o modelo de delegación de accións proposto polo club non se axusta nin á Lei de Sociedades de Capital nin aos estatutos do propio Deportivo e por iso acudiu ao xulgado. Tamén presentara unha solicitude de suspensión cautelar da Xunta, pero esta retirouna cando o Xulgado decidiu citar ás partes o vindeiro luns, nunha data posterior á Asemblea.
A Xunta, co 34,91% do capital social presente e representado, con 138 accionistas no salón Arao de Palexco, comezou con certa tensión pola intervención de Otero, quen asegurou que unha empresa de Tino Fernández, dirixente desde 2014, é a máxima accionista do club. "Tino é o máximo accionista do club a través dunha empresa totalmente descoñecida para o deportivismo", precisou nunha quenda de palabra que solicitou amparándose na Lei de Sociedades de Capital.
Afirmou Otero, expresidente da Federación de Peñas do club, que Fernández "está a enganar a todos os socios coa complicidade dos seus conselleiros, cambiando o modelo de xestión ás costas dos socios". Tras a participación do candidato, outros socios tamén interviñeron na Asemblea e en varias ocasións o presidente tivo que pedir que se acougasen os ánimos na sala.
O dirixente respondeu a Otero e asegurou que non é o máximo accionista do club senón o segundo. "Algunhas acusacións ademais de mentira, son francamente graves", comentou o presidente, quen afirmou que "o primeiro accionista do Deportivo é a Corporación Hijos de Rivera", Estrella Galicia.
"Eu estou o segundo, teño propias 605, con independencia das que teñen empresas en que podería estar eu", sostivo o mandatario.
Fernández repite o Consello de Administración co que chegou á presidencia do Deportivo en xaneiro de 2014 coa excepción de Ramón Piña, que substitúe a Fernando Vidal, quen presentou a súa dimisión na tempada 2017/18. Continúan na dirección do club, ademais do dirixente, Enrique Calvete, Daniel Ramos, Juan José Xaén e Martín Pita.
Cada un dos seis foron avalados por 59.298 accións, o que supón o 98,998 por cento, cun 1,002 por cento de votos nulos.
