O holandés Max Verstappen (Red Bull) gañou este domingo o Gran Premio de Austria, o noveno do Mundial de Fórmula Un e que se disputou no Red Bull Ring de Spielberg, onde o inglés Lewis Hamilton (Mercedes), líder do certame, foi quinto.
Verstappen logrou a vitoria, nun emocionante final, por diante do monegasco Charles Leclerc, de 21 anos, que saíra desde a 'pole' e ao que o holandés pasou a falta de dúas voltas (nunha acción que está a ser investigada); nunha carreira que o finlandés Valtteri Bottas (Mercedes) acabou terceiro; e o alemán Sebastian Vettel (Ferrari), cuarto.
Carlos Sainz, que, por penalización, ao haber substituído motor e caixa de cambios do seu McLaren, saíu desde o fondo da grella (decimonoveno); protagonizou a gran remontada do día, ao ascender, logo dunha gran actuación, once postos, para acabar a carreira na oitava posición.
O seu compañeiro, o inglés Lando Norris, concluíu sexto, por diante do francés Pierre Gasly (Red Bull), que cruzou a meta en sétima posición.
Tamén entraron nos puntos o finlandés Kimi Raikkonen (Alfa Romeo), que foi noveno; e o seu compañeiro italiano Antonio Giovinazzi, décimo en Austria.
Hamilton lidera con 197 puntos -31 máis que Botas; e con 51 respecto de Verstappen- un Mundial cuxa próxima carreira será o Gran Premio de Gran Bretaña, en Silverstone (Inglaterra), o próximo 14 de xullo.