O principal favorito para facerse coas accións do CD Lugo propiedade do Concello e a Deputación, Tino Saqués, terá que pagar en man e nun só pago os 1.600.500 euros para comprar os 150.000 títulos que o converterían no máximo accionista do club. Os servizos técnicos do organismo provincial consideraron que o empresario lucense non especificou na súa oferta que adquiriría as accións a prazos, polo que deberá facelo nun único desembolso e no prazo dun mes, tal e como se establecía nas bases iniciais do concurso de venda do paquete accionarial.
Os servizos técnicos da Deputación, tras estudar o caso en profundidade, chegaron á conclusión de que Saqués non poderá modificar a posteriori os termos da oferta presentada, xa que suporía unha vantaxe con respecto ao outro candidato a facerse coa adxudicación dos títulos. No caso de poder cambiar as ofertas unha vez concedidas as accións, o outro candidato podería puxar por unha cantidade maior se os prazos de pago eran convenientes aos seus intereses.
