Desde que en abril Too Good To Go desembarcou na Coruña, a iniciativa foi sumando adeptos tanto entre os establecementos de restauración como entre os locais dedicados á venda de alimentos. A plataforma, que desenvolveu unha aplicación para o móbil que permite a estes negocios vender o seu excedente diario de comida a un prezo reducido en lugar de tiralo —a cambio de abonar unha comisión por cada pedido—, conta con 20 establecementos adheridos na cidade herculina e a súa rede incluso chegou a Betanzos.
"Temos unha oferta moi variada, pois pódese salvar comida tanto en fruterías, como panaderías e confeiterías; tamén hai algunha tenda de comida preparada, pizzería e algún restaurante", constata Oriol Reull, o director de Too Good To Goo en España. E a idea é ir ampliando o radio de acción na comunidade galega, visto que "a diario estanse vendendo practicamente todos os packs dispoñibles" a través da app. "Independentemente de onde estean situados, todos os establecementos que queiran poden sumarse", explica Reull, que sostén que a iniciativa ten vocación de chegar "aos pobos pequenos".
Too Good Too Go estima que por cada pedido que se salva' evítanse emisións equivalentes a un percorrido de 7,9 quilómetros en coche
Para o cliente, a operativa é sinxela, pois basta con descargarse o programa no móbil, que é gratuíto. Unha vez activada, a app xeolocaliza ao usuario e móstralle as tendas e restaurantes que ten ao seu alcance, nos que pode "salvar lotes sorpresa de comida". "Seleccionas o teu favorito e elixes o número de paquetes que queres e, feito isto, pagas a través da app e xa só quedaría ir recoller o encargo ao establecemento á hora convida", indica o executivo. Normalmente, isto adoita suceder pouco antes do peche, que é cando os empresarios poden prever o produto sobrante que van ter. Isto mesmo explica que o comprador non descobre o contido da caixa ata que acode a recollela.
En canto aos prezos, por norma xeral, o consumidor paga un terzo do valor real que abonase de comprar noutro momento do día. "Se un pack inclúe barras de pan, algo de bollería e pasteis e custase nove euros comprándoo de xeito habitual, a través da aplicación sairía por uns tres". Iso si, a máxima é que o produto é fresco, aínda que xa non valería para vender como tal ao día seguinte.
O éxito da iniciativa é notorio no resto do país, pois os negocios adheridos xa superan o milleiro en toda España, en tanto que a rede de usuarios alcanza os 300.000.
IMPACTO. A plataforma pon o foco no cariz ambiental da iniciativa. Os cálculos do colectivo indican que por cada pedido de comida que se salva' evítase a xeración de 2,5 quilos de CO2, o que "equivalería ao mesmo dióxido de carbono que emitiría un coche tras percorrer 7,9 quilómetros e a deixar a luz de casa acendida durante toda a semana".
A idea de nego
cio de Too Good To Go naceu en Copenhague en 2016, dous anos antes de aterrar en España. "Todo xurdiu nun bufet no que estaba un grupo de emprendedores que viron como ao final do evento os camareiros tiraban ao lixo a comida sobrante", explica Oriol Reull. En tres anos a iniciativa captou 22 millóns de euros entre investidores privados. 170.000
Son as toneladas de comida que cada ano acaban no lixo en Galicia. Son cifras extrapoladas dun informe da FAO, que indica que en España se desperdician uns 7,7 millóns de toneladas. Ademais de supor unha aberración nun mundo no que máis de 800 millóns de persoas pasan fame, Too Good Too Go apunta que estes refugallos son responsables do 8% das emisións de gases de efecto invernadoiro.
