A asociación de consumidores Consubal avisou este luns dun fallo que pode afectar o peche do vehículo nalgúns modelos de Seat Ibiza, polo que iniciou unha campaña para animar aos propietarios a que revisen os seus vehículos.
Segundo indicou a asociación nunha nota de prensa, este problema afecta unicamente a algunhas unidades fabricadas nun período concreto.
O problema consiste en que, en caso de colisión, "o perno de masa directo de batería quede arrincado da chapa e o polo negativo da batería se desconecte das placas internas da batería", o que causaría unha "perda da enerxía eléctrica necesaria para desbloquear as portas" e "podería supor un risco importante" para os pasaxeiros, segundo explicou Consubal.
A asociación apuntou que tras preguntar á empresa polo período de fabricación afectado non obtivo "mais información que a que contén a carta que están a recibir os usuarios". Por iso, aconsellou aos propietarios que se poñan en contacto co seu concesionario achegando o número de bastidor.
