A Audiencia ratifica a ampliación de capital de Nueva Pescanova

Rexeita a apelación da matriz

Sede de Nueva Pescanova en Chapela. AEP
photo_camera Sede de Nueva Pescanova en Chapela. AEP

A sección primeira da Audiencia Provincial de Pontevedra ditou sentenza na que desestima o recurso de apelación interposto pola 'vella' Pescanova, contra a sentenza do Xulgado Mercantil que validou a ampliación de capital de Nueva Pescanova e outros acordos. 

En xuño de 2018, o Xulgado Mercantil número 1 de Pontevedra resolveu rexeitar a demanda da 'vella' Pescanova, que impugnaba a ampliación de capital aprobada na Xunta Xeral de Accionistas do 19 de abril de 2017, e outros acordos sociais de Nueva Pescanova. 

Os demandantes pedían que se declarase a nulidade da ampliación de capital, por 135,4 millóns de euros, unha ampliación que diluíu a súa participación en Nueva Pescanova até reducila ao 1,65 por cento (desde o 20 por cento anterior á ampliación). Así mesmo, sostiñan que esta operación non respondía a un "interese real", senón que a súa intención era precisamente minimizar o seu peso na sociedade. 

Con todo, o xuíz de instancia desestimou as súas pretensións argumentando, entre outras cuestións, que os acordos de ampliación de capital derivan doutro acordo anterior de refinanciamento de Nueva Pescanova, acordo "homologado xudicialmente" e que non foi cuestionado.

RECURSO DE APELACIÓN. Contra esa sentenza, a sociedade de carteira presentou recurso de apelación, esgrimindo varios argumentos: en primeiro lugar, defende que ten lexitimación activa para impugnar o acordo de ampliación de capital; en segundo lugar, cre que está acreditada a lesión do interese social de Nueva Pescanova; en terceiro termo, mantén que os acordos adoptados —tanto en relación á ampliación de capital, como á subscrición de varios créditos— eran "abusivos"; e, por último, insiste en que se vulnerou o seu dereito de subscrición preferente na ampliación. 

A Audiencia Provincial rexeitou agora eses motivos de apelación, e sinalou que non se pode probar que Nueva Pescanova xerase "artificialmente" unha situación financeira crítica, senón que, en efecto, o escenario de patrimonio "negativo" da sociedade a 31 de decembro de 2016 —estaba incursa en causa legal de disolución— obrigou á adopción desas medidas de refinanciamento. 

A ese respecto, o tribunal lembrou que a 'vella' Pescanova non puxo "queixa nin reserva" á aprobación das contas anuais de 2015 e 2016 —aínda que se abstivo na votación—; que non impugnou o acordo de refinanciamento, que foi logo "homologado" xudicialmente; e que tampouco foi privada do dereito de subscrición preferente na ampliación de capital, xa que se lle ofreceu a posibilidade de adherirse ao acordo de refinanciamento de decembro de 2016 e rexeitouno, alegando que implicaba "aceptar un sacrificio patrimonial inaceptable".

SENTENZA "LESIVA". Pescanova S.A. comunicou esta resolución á Comisión Nacional do Mercado de Valores, a través da publicación dun 'feito relevante', e confirmoulle ao regulador que a Audiencia desestimou "integramente" as súas pretensións. A ese respecto, a sociedade cualificou a sentenza como "lesiva" para os seus intereses, e confirmou que non está "en absoluto de acordo cos seus fundamentos". Por iso, avanzou que o Consello de Administración analizará a "eventual interposición de recurso de casación ante o Tribunal Supremo".

Comentarios