Os prezos que as industrias e primeiros compradores pagaron aos gandeiros galegos polo leite entregado en xuño reflicten outra pequena baixada no importe medio que eleva a caída acumulada desde inicios de ano a 1,7 céntimos por cada litro. A última referencia son os 30,4 céntimos abonados o mes pasado, fronte aos 32,2 que chegaron a cobrar como media as explotacións a finais de 2017 tras un período de lixeira recuperación que durou apenas medio ano.
A caída rexistrada no primeiro semestre supón que unha granxa media na comunidade —cunha produción que roldaría os 30.000 litros ao mes— cobrou pola materia prima obtida en xuño uns 390 euros menos que en xaneiro. De continuar a tendencia actual, os prezos en orixe poderían perder de novo a barreira dos 30 céntimos por litro este mesmo ano. No momento máis baixo desta última crise, a iniciada en 2014, o litro chegou a baixar dos 27 céntimos, no verán de 2016.
Mentres en Galicia continuou a tendencia de caída, no conxunto da Unión Europea houbo en xuño unha pequena subida do leite que rompeu con seis meses en retroceso. O importe medio se nbsp;situou&en 32,3 céntimos, un 0,7% máis que no mes anterior. Potencias como Francia, Holanda ou Bélxica contribuíron a esa mellora, mentres quedaron á marxe os gandeiros de Alemaña, Dinamarca ou España, onde as comunidades coas maiores producións —Galicia, Castela e León e Asturias—, rexistraron baixadas.
