A elección da tarifa da electricidade é unha das claves para aforrar, xunto con trucos como ter contratada a potencia axustada ás necesidades, tarifas de discriminación horaria, programar o consumo para as horas nas que a enerxía resulta menos custosa ou incluso dispor de electrodomésticos eficientes. Segundo o último informe supervisión da Comisión Nacional dos Mercados e a Competencia (CNMC), a diferenza entre a oferta máis barata e a máis cara para un pequeno consumidor doméstico oscila entre os 150 e os 200 euros ao ano.
Os prezos medios movéronse entre os 0,22 euros por quilowatt/hora (kWh) e os 0,27 para fogares que non teñen contratada a discriminación horaria e entre os 0,16 e os 0,20 para os que si subscribiron esta opción que permite distinguir dúas ou tres períodos de facturación, cun prezo para o kWh máis económico en determinadas horas, o que pode interesar a quen concentran o seu consumo nunha franxa do día ou teñen coche eléctrico.
É unha das conclusións do estudo, baseado na análise das 545 ofertas de luz activas a finais de 2017 no comparador online do superregulador, que pode consultar calquera usuario. O organismo constata que as ofertas "máis baratas" para os fogares son, en xeral, as que se contratan e facturan a través de internet. Tamén apunta que as propostas a prezo fixo por un ano do mercado libre que están obrigadas a ofertar as comercializadoras de referencia —isto é, coas que se pode contratar o prezo voluntario ao pequeno consumidor (PVPC), a tarifa regulada para usuarios cunha potencia de ata 10 quilowatts— "continuaron" no segundo semestre do ano pasado "entre as de prezos máis elevados, aínda que sen chegar a ser as máis caras". Ante esta realidade, Competencia expón eliminar a obrigación de ofrecer este produto que contrataron uns 2.500 consumidores para escapar ás flutuacións dos prezos da enerxía que inflúen na PVPC.
Na súa revisión, os técnicos tamén fixeron unha estimación do aforro entre a mellor oferta do mercado liberalizado e a PVPC. No caso da luz, mentres en informes anteriores quedaba de manifesto que a PVPC —con 11,5 millóns de clientes— era a máis competitiva, en 2017 houbo tarifas máis baratas no mercado libre. En concreto, un fogar con discriminación horaria podía desembolsar ata 70 euros menos ao ano, 31 sen esta opción. Con todo, asociacións de consumidores como a Ucgal chaman a meditar ben calquera cambio, pois salvo contadas excepcións, o prezo regulado adoita saír mellor para o peto.
No caso das pemes, unha mala elección da tarifa da luz pode carrexar pagar ata 3.000 euros máis ao ano
En canto aos consumidores que ao ter un elevado consumo eléctrico non teñen dereito á PVPC, caso das pemes, o impacto entre a oferta máis económica e a máis cara oscila entre 1.000 e 3.000 euros ao ano.
Tras analizar as 108 ofertas do gas natural activas a peche de 2017, a CNMC conclúe que a brecha de prezos pode alcanzar os 83 euros ao ano para un consumidor sen calefacción, escalando ata os 180 para o que si usa este combustible para quentar a casa e vive nunha zona fría. Estas diferenzas son as que soportan os usuarios con dereito a acollerse á tarifa de último recurso (TUR) que fixa o Goberno, e Competencia constata que se ensancharon "considerablemente" respecto de anos anteriores. Por norma xeral, ao peche de 2017 o prezo medio das ofertas no mercado libre "estaba por encima do prezo da TUR", aínda que era posible aforrar algo acolléndose á mellor promoción dependendo do nivel de consumo.
Para consumidores de gas sen dereito a TUR a diferenza é máis acusada, pois ao cabo do ano poden gastar entre 633 e 2.927 euros máis en función da súa elección.
A CNMC chama aos consumidores a estudar ben o que asinan e a vixiar a colocación indeseada de servizos adicionais
Competencia tamén analizou paquetes de luz e gas e concluíu que, "desde maio de 2014", a contratación da mellor oferta dual "non só non supón ningún aforro fronte á opción de contratar por separado" as máis económicas das dúas subministracións, senón que, ademais, "resulta máis cara".
ABUSOS. En canto ao incremento sostido dos prezos que desde maio deste ano experimentaron tanto o mercado eléctrico como o do gas, o organismo que preside José María Marín Queimada chama ás comercializadoras a respectar "todas as obrigacións de transparencia e información veraz aos consumidores". Ante a decisión de varios grupos de rescindir ou modificar contratos "sen manter as condicións pactadas", alerta de que estas prácticas "poderían non adecuarse ao dereito ao deixar a interpretación" do acordo a vontade da comercializadora.
Competencia, que chama aos consumidores a estudar ben o que asinan e a vixiar a colocación indeseada de servizos adicionais, recorda ás eléctricas que en caso de subir prezos, deben comunicar o custo actual, o novo e o aumento, ademais da posibilidade de rescindir o acordo sen custos. O organismo avanza que xa abriu expedientes sancionadores.
