Bruxelas investiga se son legais as axudas públicas a Peugeot para investir en Vigo

A CE abriu un procedemento para dilucidar se o plan de España por 20,7 millóns se axusta ás normas comunitarias

Trabajadores en la factoría de PSA en Vigo
photo_camera Traballadores na factoría de PSA en Vigo

A Comisión Europea (CE) abriu este luns unha investigación en profundidade para avaliar se o plan de España de conceder 20,7 millóns de euros en axudas públicas ao grupo PSA, fabricante de Peugeot, para investir na súa planta de Vigo cumpren as normas europeas de axudas de Estado a rexións.

"A Comisión investigará meticulosamente se as axudas previstas de España son realmente necesarias para que Peugeot invista en procesos de produción verdadeiramente innovadores en Vigo e se van desenvolver a rexión sen falsear indebidamente a competencia ou ir detrimento da cohesión na UE", dixo nun comunicado a comisaria europea de Competencia, Margrethe Vestager.

A apertura da investigación dá a España e terceiras partes a oportunidade de pronunciarse sobre o caso e non prexulga de ningún xeito o resultado final, que deberá determinar se se cumpren as normas.

O grupo PSA, fabricante de Peugeot e Citroën, está a investir 500 millóns de euros en novas liñas de produción e en melloras do proceso produtivo na fábrica de Peugeot en Vigo.

O traballo nas novas liñas comezou en 2015 e en 2017 España notificou á Comisión que desexaba conceder axudas públicas a este proxecto por un total de 20,7 millóns de euros, recordou o Executivo comunitario.

Bruxelas "dubida" de que as axudas previstas por España "se axustasen a todos os criterios" que esixen a Unión Europea para permitir que os Estados dean axudas públicas ás rexións máis desfavorecidas para impulsar a súa economía, indicou a Comisión.

As dúbidas sobre as axudas
En concreto, o Executivo comunitario teme que PSA realizase o investimento en Vigo incluso sen axudas do Estado ou que esta contribución pública poida atraer este proxecto de investimento a Galicia desde outra rexión máis desfavorecida doutro país da UE.

Ademais, as normas sobre axudas rexionais non permiten que se beneficien deste apoio as grandes empresas que invisten en instalacións xa existentes agás que os investimentos permitan cambios fundamentais e innovadores no proceso de produción que se apliquen por primeira vez nese sector -neste caso o automobilístico- no Espazo Económico Europeo.

Neste sentido, a Comisión "dubida de que o proceso de produción previsto sexa o suficientemente innovador como para poder acollerse a esa excepción", explicou nun comunicado.

Bruxelas tamén ten dúbidas sobre a contribución que terán as axudas ao desenvolvemento rexional e sobre a súa "idoneidade e proporcionalidade". Así mesmo, non pode descartar polo momento que vaian ter efectos negativos sobre a competencia no mercado de turismos ao que se dirixen os investimentos de PSA.

Comentarios