martes. 28.01.2020 |
El tiempo
martes. 28.01.2020
El tiempo

Caballero dá o seu apoio ao persoal de Povisa, que pide garantías "por escrito" sobre o emprego

Entrada do Hospital Povisa. DP
Entrada do Hospital Povisa. DP
O comité advirte á Xunta de que "non pode mirar a outro lado" cando está "en xogo" a saúde de miles de pacientes do Sergas

O alcalde de Vigo, Abel Caballero, trasladou este luns o seu "apoio total" ao persoal de Povisa, tras coñecerse que o hospital cambia de propietarios e pasa a formar parte do grupo Ribera Salud (propiedade da multinacional americana Centene), e sinalou que estará "ao seu lado" para reclamar que non se perda "nin un só posto de traballo" e que se manteña a "calidade asistencial" para os 135.000 pacientes concertados do Sergas. 

Nunha rolda de prensa, tras manter unha reunión co comité de empresa do hospital, o rexedor olívico instou aRibera Salud a que "unha parte da capitalización" da empresa a destine a mellorar as condicións dos traballadores, que levan 10 anos cos soldos conxelados. "Levan moitos anos de sacrificio e esforzo, e agora será o momento de mellorar a súa situación", aseverou. 

Por outra banda, o alcalde insistiu en que se debe "manter e mellorar" a calidade da asistencia que reciben os 135.000 pacientes do Sergas, dos que uns 80.000 son veciños de Vigo. 

COMITÉ. Pola súa banda, a delegada da CIG no comité, Chus Neira, advertiu de que os traballadores xa non aceptan "palabras bonitas" e queren "feitos", polo que esixiu que se reflicta "por escrito" o compromiso de que se manterán os empregos e as condicións laborais do persoal. 

Así mesmo, reiterou que o sindicato nacionalista esixe que, de aquí a 2022 (data en que finaliza o concerto de Povisa co Sergas) se adopten os "mecanismos" necesarios para que a parte de atención pública deste hospital vigués intégrese na rede do Sergas. "Non queremos que unha multinacional americana xestione a parte pública de Povisa", insistiu. 

Finalmente, lamentou que o rexedor lles comparase" co Hospital Álvaro Cunqueiro que, segundo o alcalde, é "privado". "Que nos digan que este modelo é como o Álvaro Cunqueiro parécenos gravísimo. Non é o mesmo modelo, o Álvaro Cunqueiro é un hospital do Sergas, cunha parte da súa xestión (o non asistencial) privada", incidiu. 

Común da Esquerda cualifica de "indecente" a venda de Povisa e pide á Xunta que compre o hospital

Mentres, Ruth Vallejo, de SGPS-CXT, agradeceu o apoio do rexedor e advertiu de que o seu sindicato "non vai permitir máis privatización da sanidade pública". Así mesmo, advertiu á Xunta de que "non pode mirar cara outro lado" cando está "en xogo" a saúde de 135.000 pacientes do Sergas. 

Pola súa banda, Xurxo Cabral, de CC.OO., apuntou que Ribera Salud debe, non só garantir os postos de traballo, senón introducir melloras no convenio (que se está negociando actualmente), porque o persoal leva unha década de recortes e salarios "conxelados". 

Na mesma liña, Josué Rial, do sindicato de enfermería UNENF, apuntou que os novos donos de Povisa deben "comprometerse a negociar" melloras nas condicións laborais. 


O PPdeG, tranquilo ante un traspaso de Povisa criticado desde a oposición

 O portavoz parlamentario do PPDEG, Pedro Puy, mostrouse este luns "tranquilo" con respecto ás condicións nas que operará o hospital de Povisa tras a venda do mesmo, que foi criticada por unha oposición que entende que o correcto sería asumir para a súa xestión pública este centro. En rolda de prensa, Puy insistiu en que, con relación a Povisa, o "importante é que se cumpra o concerto" deste hospital co Sergas no que se fixan uns determinados "niveis de calidade", algo do que se mostrou seguro debido á supervisión que exerce sobre o mesmo a Xunta de Galicia.

Así mesmo, manifestou que traspasos como este son habituais" gusten máis ou menos, ademais de recordar que, no caso da área de Vigo, os pacientes poden "optar por distintas prestacións" sanitarias entre os centros públicos e privados existentes.

O PPdeG insiste en que o Goberno galego "estará vixiante" e fará cumprir o convenio aos novos compradores

A resposta a unha pregunta sobre este tema do portavoz parlamentario do PSdeG, Xoaquín Fernández Leicega, foi nunha liña similar, na que explicitou que, a nivel empresarial, "esta é unha operación de compravenda entre dúas empresas privadas", aínda que afecte a un servizo público "de enorme transcendencia", posto que Povisa "non é un elemento alleo á cobertura das necesidades sanitarias da poboación de Vigo".

Por este motivo, reclamou ao Goberno galego que garanta que "non existe a mínima diminución das condicións sanitarias da poboación de Vigo" agora que hai unha nova empresa operando e tamén trasladou a súa "preocupación" pola situación duns traballadores "que levan anos servindo á sanidade pública".

Neste sentido, o portavoz socialista pediulle á Xunta que teña "unha presenza diante dos novos propietarios para manifestarlle estas esixencias e que estes lle dean garantías de que as van a cumprir".

Máis viscerais foron as respostas do resto de grupos da oposición, que criticaron con máis firmeza esta operación e que o Goberno galego non tome cartas no asunto para asumir a xestión do centro.

A deputada do Grupo Común da Esquerda Eva Solla chamou á Xunta de Galicia a facerse coa titularidade do centro "da forma menos gravosa posible" coa intención de garantir os 1.350 postos de traballo que dependen directamente de Povisa "e que todos os galegos teñan o mesmo acceso a unha sanidade pública de calidade".

Mentres tanto, a viceportavoz do grupo, Luca Chao, advertiu de que a Xunta "está a seguir o modelo privatizador de Valencia, onde o fondo que quere comprar Povisa deixou débedas por valor de 140 millóns de euros".

Pola súa banda, o deputado do Grupo Mixto Pancho Casal afirmou que "por 22 millóns poderiamos ter a propiedade completa do hospital" para evitar que este quede "en mans de xestores expulsados da Comunidade Valenciana pola súa ineficacia e a súa mala praxe".

Caballero dá o seu apoio ao persoal de Povisa, que pide garantías...
Comentarios