O sindicato CIG-Servizos anunciou este martes o inicio dunha campaña contra a decisión da firma Zara, do grupo téxtil Inditex, de instalar máquinas de pago automático nalgunhas tendas da provincia da Coruña por considerar que "substitúe así ás traballadoras" que cobran nas caixas.
A citada campaña incluirá a repartición de información a clientes nos comercios das firmas Zara e Lefties do centro comercial Marineda City da Coruña, onde xa foi instalado ese sistema, co "fin de concienciar" das "graves consecuencias que iso ten para o emprego", apunta CIG nun comunicado.
O sindicato considera que "este é o principio" dun proceso no que "Inditex intentará implantar este sistema paulatinamente no resto das súas cadeas".
CIG indica que exhortou aos responsables de Zara en varias ocasións a retirar "esas caixas" e critica a "avaricia das grandes empresas como Inditex", que opina que "en lugar de reverter os millóns de beneficios na creación de postos de traballo nas propias tendas, destrúenos para seguir gañando miles de millóns".
O sindicato invita así á clientela a que "cada vez que faga unha compra, antes de pagar nunha caixa de autocobro, pense primeiro nos postos de traballo que se perden aumentando os millóns de beneficios de Inditex a conta da nosa precariedade e da perda de postos de traballo no futuro".
