El Corte Inglés, o maior grupo español de distribución, e o xigante chinés do comercio electrónico Alibaba anunciaron este xoves un acordo de intencións para desenvolver de forma conxunta novas oportunidades de negocio no comercio en liña e compartir os seus espazos, físicos e virtuais, para mellorar a súa oferta. Ambas as empresas perseguen aproveitar o mellor das tendas físicas e do mundo virtual e comprométense a colaborar estreitamente nas áreas de comercio polo miúdo e distribución, servizos na nube, innovación dixital e pagos con teléfono móbil.
Segundo informaron este xoves nun comunicado conxunto, El Corte Inglés e o grupo chinés queren aproveitar as súas respectivas fortalezas e as das súas distintas unidades de negocio e empresas asociadas, incluídas Tmall, Alibaba Cloud, Alipay e AliExpress. "Este acordo vainos permitir axuntar o mundo físico e o online, ofrecendo a mellor experiencia de compra ao cliente. Xuntos estamos a escribir o futuro e situándonos á vangarda da tecnoloxía e do comercio", sinalou o conselleiro delegado de El Corte Inglés, Víctor del Pozo.
Del Pozo subliñou que o feito de contar con grandes almacéns nas mellores localizacións das principais cidades españolas e portuguesas, unido á confianza que xera El Corte Inglés nos consumidores e á tecnoloxía de Alibabá, permitiralles ofrecer "unha proposta de valor imbatible".
Pola súa banda, o director de Alibaba para España, Italia, Portugal e Grecia, Rodrigo Cipriani, dixo que esperan poder "unir forzas" con El Corte Inglés para ofrecer aos consumidores en China e en todo o mundo os mellores produtos e experiencias.
En materia de comercio, o acordo permitirá á firma española ofrecer os seus produtos e marcas nas plataformas de comercio electrónico de Alibaba tanto en China (vía Tmall), como no resto do mundo (a través de AliExpress). Pola súa banda, AliExpress poderá desenvolver espazos físicos nos centros comerciais de El Corte Inglés. Ademais, ambas as empresas van traballar "estreitamente" no uso de infraestruturas e canles loxísticas.
En canto a métodos de pago, El Corte Inglés incorporou en marzo pasado Alipay, a plataforma de pago móbil intelixente operada por Ant Financial, compañía asociada ao grupo Alibaba, para facer máis fáciles e seguras as compras aos turistas chineses que visitan España.
