Dun pequeno taller en Extramundi con cinco traballadores que producía fiestras de aluminio para a comarca de Padrón cando o que se estilaba era aínda o ferro e a madeira a unha multinacional que vende en 60 países, suma nove fábricas, 31 centros de distribución en Europa e constrúe o seu propio campus tecnolóxico, onde 350 enxeñeiros e arquitectos idearán os cerramentos do futuro. Así se resume a metamorfose que Cortizo experimentou desde que o seu fundador, José Manuel Cortizo Sóñora, plantase os cimentos en 1972. O grupo lidera a fabricación de solucións en aluminio e PVC que hoxe coroan cubertas como a do estadio de Maracaná, en Brasil, e asina as ventás de rañaceos de México, así como compoñentes producidos para Airbus, o Ave e os vagóns do metro de Hong Kong.
A fórmula do éxito baséase en reinvestir os beneficios no crecemento, combinar "a valentía, co esforzo, o sacrificio" e o equipo humano, e en saber anticiparse aos cambios do mercado, unha habilidade coa que o grupo capeou a crise redobrando a súa aposta polo negocio internacional. As claves debullounas este mércores a segunda xeración, que encabeza a directora xeral, Raquel Cortizo, xunto ás súas irmás Naira (responsable de compras de accesorios e compoñentes); Miriam (área de prescrición) e Yaiza (administradora do grupo patrimonial, Cartera Sar). As catro recolleron o Premio Emprendedor do Ano de Galicia que entrega Ernst&Young (EY), a auditora que ten á exconselleira de Facenda Marta Fernández Currás como responsable da súa delegación na comunidade. O 20 de febreiro de 2020 as catro serán as representantes galegas que competirán con outros empresarios na final nacional do premio que EY organiza con BNP Paribas e a escola de negocios IESE.
O 70% das súas vendas sélanse noutros países
"Detrás estaba un emprendedor, o noso pai, do que aprendemos eses valores que seguiremos trasladando ás xeracións vindeiras", recalcou Raquel Cortizo tras recoller o galardón.
Nun xantar ao que acudiron representantes doutras empresas familiares como Norvento, Hierros Añón, Jealsa, Calvo, Hijos de Rivera, Megasa, ou Grupo Puentes, rememorou os inicios do seu pai en 1972 e como, tras regresar do servizo militar, a través dun coñecido presentou as súas por entón novas fiestras de aluminio a un promotor inmobiliario de Salamanca. Foi así como José Manuel Cortizo, que este mércores acompañou ás súas fillas, tivo que ampliar o seu pequeno taller para responder a unha demanda de 800 fiestras á semana. Aos cinco anos de abrir o seu negocio xa contaba con 30 traballadores e a súa produción franqueaba o Padornelo. "Ao mirar atrás dános un pouco de vertixe, pero ao mesmo tempo prodúcenos un inmenso orgullo", remarcou a directora xeral.
Teñen cinco fábricas en España e outras tres en Francia, Eslovaquia e Polonia
As irmás recibiron o premio de mans do presidente da Xunta, quen, tras proclamar o seu "orgullo", celebrou que a multinacional siga ancorada na comunidade, onde "crea riqueza". "Se deslocaliza, xa non sería Cortizo, sería calquera cousa que anda por aí e que aos galegos non lles importaría nada", afirmou Núñez Feijóo.
Pola súa banda, Fernández Currás mencionou como "claves do crecemento" as raíces rurais, a internacionalización, a formación e a competitividade. Foi nun discurso no que rememorou como, en plena crise, nunha visita ao cuartel xeral de Padrón soubo que nun mes Cortizo quedara sen pedidos, unha situación que reverteron "fortalecendo o seu plan de internacionalización", co que un ano despois "recuperaran o seu potencial de crecemento".
3.300
Son os traballadores de Cortizo. Máis da metade son empregos creados en Galicia.
