A dirección de Maderas Iglesias accedeu a rebaixar de 150 a 34 o número de traballadores afectados polo expediente de regulación de emprego (Ere) de carácter extintivo que expuxo, segundo informaron fontes sindicais.
O persoal desta empresa do Porriño dedicada á fabricación de tarima flotante ascende a 234 traballadores.
O comité de empresa, no que están representados CIG, CC OO e UXT, sinala nun comunicado que ao longo das negociacións a dirección foi reducindo o número de afectados, primeiro a 80 e finalmente a 34, e en todos os casos trátase de baixas voluntarias.
En total celebráronse cinco reunións desde a presentación do Ere hai un mes, as dúas últimas baixo a supervisión da autoridade laboral.
O comité de empresa de Maderas Iglesias agarda a que a Xunta "saiba aproveitar" o acordo alcanzado entre a dirección e os sindicatos, ao entender que é un primeiro paso para que a compañía "poida ter futuro".
Abunda en que a administración galega "ten que cumprir o seu compromiso de mediar na procura de investimentos" que garantan a viabilidade de Maderas Iglesias e o mantemento de 200 empregos, a maioría ocupados por mulleres.
