O Goberno aprobou este venres un decreto-lei con medidas urxentes sobre vivenda, incluídos cambios na regulación do aluguer como subir a 5 anos a prórroga obrigatoria dos contratos ou limitar a 2 mensualidades as fianzas, mentres descartou ou aprazou introducir topes aos prezos.
O ministro de Fomento, José Luis Ábalos, dixo en rolda de prensa que o Executivo descarta esas medidas de intervención directa nos prezos de aluguer, pero fontes do seu departamento sinalaron despois que esa posibilidade segue en estudo e que podería incluírse ou ben na fase de emendas ou ben noutra lei.
O líder de Unidos Podemos, Pablo Iglesias, considerou que o Goberno incumpriu o acordo que asinou co seu grupo parlamentario ao non incluír agora como medida urxente permitir aos concellos que fixen topes máximos aos alugueres de forma temporal e nos barrios máis tensionados. No entanto, no punto no que se recollía esa medida no acordo dábase ao Goberno como prazo "ao longo de 2019", polo que desde Fomento subliñaron que o pacto non se rompeu.
O decreto-lei modifica aspectos de cinco leis: as de Arrendamentos Urbanos (LAU), Propiedade Horizontal, Enxuízamento Civil, Facendas Locais e Imposto de Transmisións Patrimoniais (ITP).
A prórroga obrigatoria dos alugueres pasa de 3 a 5 anos, ou a 7 se o arrendador é persoa xurídica, e a prórroga tácita de 1 a 3 anos. O límite de dúas mensualidades de fianza terá excepcións unicamente en contratos de longa duración. O decreto-lei inclúe unha exención do ITP aos arrendamentos para uso estable e permanente (o imposto é autonómico pero o Estado pode inhibilo), e suprime a obrigación de repercutir o Imposto de Bens Inmobles (IBI) ao arrendatario no aluguer social. Tamén permite aos concellos con superávit destinalo a promover o seu parque de vivenda pública.
Os consistorios tamén poderán establecer unha bonificación de ata o 95% na cota do IBI para os alugueres a prezo limitado. Os alugueres turísticos saen da LAU e regularanse como unha actividade económica. As comunidades de veciños poderán adoptar acordos por unha maioría de tres quintos para limitar un aluguer turístico no seu edificio.
Refórmase tamén o procedemento de desafiuzamento de vivenda, cunha solicitude obrigada dun informe aos servizos sociais sobre en que condición quedarán os desafiuzados. Unha vez que o informe sexa recibido no xulgado paralizarase o procedemento durante un mes (ou dous meses se o arrendador é persoa xurídica) para dar tempo a buscar unha solución para os desafiuzados.
Outra medida máis que se incluíu é permitir o dereito de tenteo e retracto ás administracións públicas cando se vaia enaxenar un edificio de vivendas enteiro. Tamén se vai introducir na Lei de Facendas Locais a definición de inmoble de uso residencial desocupado con carácter permanente. Así, os concellos poderán aplicar a recarga do IBI que estableceu o PP en 2002, pero que os concellos non usaban ao faltar un desenvolvemento regulamentario estatal.
O xefe de estudos de Idealista, Fernando Encinar, cre que desequilibrar a balanza entre propietario e inquilino, "como fixo o Goberno", provocará que a oferta sexa menor e os prezos suban.
Beatriz Toribio, directora de estudos de Fotocasa, deu unha boa acollida aos cambios nas leis aprobados e pareceulle moi oportuno que o Goberno non inclúa a fixación de topes de prezos ao aluguer, debido "á complexidade e os riscos que ten".
