O Goberno prevé que o esborralle da economía española a consecuencia da crise do coronavirus chegue ao 9,2% en 2020 e que a taxa de desemprego suba ao 19%, de acordo co novo cadro macroeconómico presentado este venres e incluído na actualización do programa de estabilidade 2020-2023.
A contracción económica será consecuencia do esborralle do consumo dos fogares (8,8%) e do afundimento do investimento (25,5%) e as exportacións (27,1%), explicou en rolda de prensa a vicepresidenta económica, a galega Nadia Calviño.
Segundo dixo, a economía tocará fondo no segundo trimestre do ano e recuperarase desde entón en forma de "V asimétrica", o que levará a un rebote da economía do 6,8 % en 2021.
DÉFICIT. O Goberno prevé que o aumento do gasto público e a caída dos ingresos asociados á crise do coronavirus disparen o déficit público en 2020 ata 115.671 millóns de euros, equivalentes ao 10,34% do PIB, de acordo coas novas previsións gobernamentais presentadas este venres.
Será do maior déficit rexistrado desde o peche de 2012 (10,7 % do PIB), segundo destacou en rolda de prensa a ministra de Facenda, María Jesús Montero.
A ministra detallou que os gastos subirán un 10,5% ata 576.714 millóns de euros, mentres que os ingresos caerán un 5,3%, ata 461.043 millóns.
