O Ministerio de Defensa reactivou este mércores a venda de 400 bombas láser a Arabia Saudita, unha operación pechada con Mariano Rajoy cuxa posible suspensión tras o cambio de Goberno puxo en albas aos traballadores de Navantia polo temor a que Riad retirase o pedido de cinco corvetas á empresa pública.
Así o avanzaron este mércores algúns medios citando fontes diplomáticas e gobernamentais, aínda que ao peche desta edición non había confirmación oficial desde o departamento que dirixe Margarita Robles.
De confirmarse, desaparecería a incerteza sobre a continuidade do encargo que brindaría carga de traballo aos estaleiros de Navantia en Cádiz, principalmente, e tamén aos da ría de Ferrol.
O persoal en San Fernando deseñara un calendario de mobilizacións, pero este mércores desde o comité de empresa decidiron paralizar as protestas ante as xestións diplomáticas realizadas ante Arabia Saudita e tras a reunión que responsables de Navantia mantiveron coa Armada do país.
Anunciárono sen ter constancia desa información sobre o desbloqueo na venda de bombas, que o Goberno de Pedro Sánchez puxera en estudo ante o risco de que os sauditas utilizasen ese armamento para atacar á poboación do Iemen. As presións da oposición e o cadro de persoal de Navantia abocárono a actuar.
