jueves. 22.10.2020 |
El tiempo
jueves. 22.10.2020
El tiempo

O Goberno traza un plan para a automoción de 3.750 millóns

Unha muller nun concesionario. EP
Unha muller nun concesionario. EP
Investirá 450 millóns en renovar o parque e subvencionará coches de combustión

O Goberno presenta este luns un plan integral de apoio ao sector da automoción dotado con 3.750 millóns de euros, que incluirá axudas para a renovación do parque de vehículos e ten entre as súas metas avanzar na transición ecolóxica. Adiantouno este domingo Pedro Sánchez, quen detallou que o programa inclúe investimentos e reformas legais, estímulos á investigación e á innovación, unha fiscalidade que dote de maior competitividade o sector e formación e cualificación para os traballadores. 

O plan incluirá medidas de financiamento "especialmente" para vehículos eléctricos e axudas para que as familias con menos recursos non queden "atrás", mentres que empresarios e traballadores autónomos se beneficiarán a través de aforros "en combustible", xa que se facilitará a renovación do parque de vehículos para que sexa máis eficiente. 

Así, no borrador —ao que tivo acceso Europa Press— prevese incorporar unha partida de 450 millóns destinada á renovación do parque automobilístico e tamén o da Administración por vehículos de enerxías alternativas e de cero emisións e turismos con motores de combustión eficientes. Isto é, que conten coas etiquetas A ou B da Dirección Xeral de Tráfico e emisións de dióxido de carbono (CO2) de menos de 120 gramos por quilómetro. 

Eses fondos divídense en 250 millóns para un programa de renovación do parque, 100 para o novo Plan Moves e outros 100 para actualizar o parque de vehículos da Administración por modelos sen emisións. Así, eses primeiros 250 millóns destinaranse a incentivar a adquisición de turismos, vehículos comerciais lixeiros, industriais pesados e autobuses, e estará vinculado, do mesmo xeito que plans anteriores como o Pive ou o Renove, a achatarrar un vehículo antigo por cada un que se adquira novo. 

Para poder solicitar as axudas, os turismos adquiridos non poderán ter un prezo de máis de 35.000 euros, 45.000 no caso de persoas con mobilidade reducida ou de vehículos con etiqueta Cero. O programa de renovación do parque está vinculado a un compromiso do sector a achegar un desconto igual ao que aplique o Goberno a través das axudas públicas.  

Os solicitantes das axudas deberán, no caso dos turismos, dar de baixa un vehículo de polo menos dez anos e o modelo novo terá que ter unhas emisións de CO2 por baixo de 120 gramos por quilómetro percorrido e contar coas etiquetas A ou B da DXT. 

O programa aumenta a 100 millóns a dotación do Plan Moves e destinará outros 100 a actualizar o parque da Administración con modelos sen emisións

Ademais, o Goberno porá en marcha a segunda edición do programa de impulso á mobilidade eléctrica e sostible (Plan Moves) que contará cunha dotación orzamentaria de 100 millóns de euros, fronte aos 65 previstos inicialmente. 

Esta medida apoiará a adquisición de vehículos de enerxías alternativas, entre os que se inclúen eléctricos e tamén os de transporte pesado impulsados con gas natural, así como a expansión da infraestrutura de recarga dos vehículos eléctricos, ademais dos sistemas de bicicletas eléctricas compartidas e tamén impulsará accións para lograr unha mobilidade eficiente aos centros de traballo. 

Co conxunto das liñas do plan na man, Sánchez destacou que o Goberno traballou co sector para elaborar unha iniciativa que pretende dar resposta ás súas necesidades e avanzar na transición ecolóxica, é dicir, que pretende "acompañar" a industria na súa adaptación á mobilidade sostible mantendo a competitividade. O presidente destacou que deste xeito deféndese un sector que supón unha décima parte do PIB español e emprega a uns dous millóns de traballadores de forma directa ou indirecta. 

"Os vehículos do futuro pareceranse moi pouco aos do pasado no que se refire á incidencia no medio ambiente", sinalou, á vez que subliñou que este plan vai en liña co obxectivo de lograr cero emisións en 2050. 

O sector defendeu ata agora a necesidade de que as axudas respecten a neutralidade tecnolóxica —é dicir, que non discriminen os vehículos de diésel ou gasolina— e reclamou que se poida acceder a elas desde a súa publicación no Boletín Oficial do Estado, xa que moitos consumidores están a atrasar a decisión de compra para poder acollerse á medida.

O Goberno traza un plan para a automoción de 3.750 millóns
comentarios