Os Grupos Coren e Terras Gauda, a través da Rosaleira Conservas Vegetales, unen forzas para presentar o seu novo lcacón con grelos en conserva, elaborado a partir de produtos de máxima calidade procedentes de Galicia. A experiencia en I+D+i resultou fundamental para preservar e potenciar as propiedades nutritivas e a alta calidade duns ingredientes que representan os estándares de excelencia de ambas as compañías.
O lacón con grelos Coren-A Rosaleira, que chegará ás cadeas de distribución alimentaria e ás tendas tradicionais de Galicia "en dúas ou tres semanas", elabórase con lacón oreado e chourizos selecta de porcos alimentados con castañas, ademais de grelos e patacas con IXP de Galicia. Está concibido como un produto para o día a día, rápido e nutritivo, listo para consumir e que carece de gluten e lactosa. Terá un prezo de entre 9,99 e 10,99 euros.
Os presidentes de Coren, Manuel Gómez-Franqueira, e de Terras Gauda, José María Fonseca, destacaron que esta alianza pretende pór en valor os produtos galegos como o lacón, os grelos, os chourizos e as patacas e sinalaron que esperan seguir colaborando no futuro noutros proxectos.
"É un primeiro paso, imos ver como evoluciona este produto e estamos abertos a máis colaboracións", sinalaron fontes de Coren, nun acto celebrado este venres en Mos.
