O grupo Inditex, dono de Zara, logrou un beneficio neto no seu último exercicio fiscal, pechado en xaneiro, de 3.444 millóns de euros, o 2,2 % máis que un ano antes, mentres que as súas vendas repuntaron o 3,2 % e sumaron 26.145 millóns, informou este mércores.
As contas da compañía, que proporá un incremento do dividendo do 17 % (0,88 euros), víronse fortemente lastradas polo efecto divisa, xa que a tipos de cambio constante o avance do resultado sería do 12 % e o das vendas do 7 %.
Aínda que en termos absolutos o beneficio e a facturación bateron marcas, en cifras relativas (comparativa interanual), a evolución do resultado neto foi a peor para o período desde 2013 e a facturación rexistrou o menor aumento desde que cotiza en Bolsa e publica contas (2001).
Segundo as mesma fonte, as vendas comparables (tendas que levan abertas máis dun ano) subiron o 4 % (ata o 82 % do total) e creceron en todas as xeografías; en tanto que o negocio online repuntou o 27 % e sumou 3.200 millóns de euros, o 12 % do total.
O resultado bruto de explotación (ebitda) situouse en 5.457 millóns cun incremento interanual do 3 % (a tipos constantes a subida foi 11 %).
Con estas cifras, Inditex amplía a distancia cos seus máximos competidores na loita polo cetro da moda, como H&M, Uniqlo ou Gap.
