A Mobile Week Coruña, a primeira iniciativa impulsada por Mobile World International fose de Barcelona, deu comezo este mércores cun acto no Teatro Colón e nos próximos sete días converterá o noroeste de Galicia no epicentro do debate sobre as novas tecnoloxías acerca de como estas inflúen cada vez máis no noso día a día.
O evento, copresentado polo xornalista Sergio Martín e o robot R4, comezou coas intervencións das dúas organizacións que promoveron a celebración desta semana dedicada á tecnoloxía: o conselleiro delegado de Mobile World International, Carlos Grau, e o presidente do Club Financeiro Atlántico, Mariano Gómez-Ulla.
O presidente do CFA sinalou que concibiran a Mobile Week Coruña como un evento cunhas trinta conferencias que, finalmente, "acabou contando con cen", un feito que achacou a que "se implicou todo o mundo", en referencia a empresas privadas e institucións públicas.
Entre os asistentes a esta inauguración estaban algúns dos seus patrocinadores: o conselleiro delegado de Abanca, Francisco Botas, os presidentes da Xunta de Galicia e a Deputación da Coruña, Alberto Núñez Feijóo e Valentín González Formoso, e o alcalde da Coruña, Xulio Ferreiro, entre outros.
O conselleiro delegado de Mobile World International, que organiza o prestixioso Mobile World Congress de Barcelona, celebrou tamén o apoio recibido desde todos os sectores á hora de elixir A Coruña como o destino da súa primeira iniciativa fóra da cidade condal.
Pola súa banda, o conselleiro delegado de Abanca, que asinou un convenio de colaboración con Mobile Week Coruña para os próximos catro anos, sinalou que "xa entramos de cheo en éraa dixital" e que nin a sociedade nin a entidade que preside poden "quedar atrás", senón que "temos que apoiala".
O alcalde da Coruña, á súa vez, expresou o "orgullo" que supón para a cidade acoller este evento durante esta semana, e espera que "por moitos anos máis", no que cualificou como "unha carreira de fondo" para converter á cidade nun lugar "non só máis competitivo, senón máis favorable á igualdade e a cohesión social" a través da tecnoloxía.
Para rematar, o presidente da Xunta destacou que Galicia é "unha das comunidades autónomas máis interesantes para o sector das tecnoloxías" e conta a día de hoxe con 3.400 persoas empregadas nas Tecnoloxías da Información e a Comunicación (TIC).
A Mobile Week Coruña continuará ata o próximo 28 de novembro con preto de cen conferencias que buscarán achegar a cidadáns de todas as idades aos debates que se están mantendo a día de hoxe con respecto ás novas tecnoloxías, a innovación e a súa influencia na sociedade.
Fronte a outras conferencias e eventos que se centran no mundo empresarial ou académico, a Mobile Week Coruña traslada o seu obxectivo á cidadanía para que tome parte nun debate que está destinado a cambiar as nosas vidas.
