Instagram anunciou que superou os 1.000 millóns de usuarios mensuais activos en todo o mundo, durante un acto celebrado este mércores en San Francisco (EE UU).
"Desde o noso lanzamento en 2010, vimos con asombro como a comunidade prosperou e crecido. Este é un gran logro", sinalou o conselleiro delegado de Instagram, Kevin Systrom.
No acto, Instagram, propiedade de Facebook, presentou IGTV, unha nova aplicación que permite ver vídeos de ata unha hora de duración centrada nos creadores profesionais de contidos e celebridades que usan esta rede social.
IGTV é unha aplicación independente e tamén unha opción dentro da plataforma de Instagram.
Está especialmente deseñada para ver no teléfono móbil vídeos ou programas de longa duración en formato vertical creados por estrelas das redes sociais ou do mundo do espectáculo con millóns de seguidores en Instagram.
IGTV funciona como cando se acende unha televisión: ao abrir a aplicación, comezan a reproducirse os vídeos.
Instagram sinalou este mércores que contas moi populares como as de Kevin Hart, Kim Kardashian West, Nicky Jam, Chris Hemsworth ou Lele Pons xa empezaron a usar IGTV.
Para os usuarios normais, o límite de duración será de 10 minutos por vídeo.
Co lanzamento de IGTV, Instagram entra en competición directa coa televisión tradicional e co sitio de vídeos Youtube, propiedade de Google, á hora de ofrecer contidos audiovisuais de longa duración.
