Liberbank disparouse este venres un 19,90 % en Bolsa, ata 0,47 euros, pola suposta intención de Abanca de lanzar unha opa sobre a entidade, inmersa nun proceso de fusión coa andaluza Unicaja Banco, que retrocedeu o 4,20 %.
Abanca, o grupo controlado polo venezolano Juan Carlos Escotet, admitiu conversacións con accionistas de Liberbank para "promover unha acción corporativa entre ambas as entidades" cun troco de accións e o pago en efectivo de ata 0,56 euros por título.
Pero antes diso e do inicio da sesión bolsista, a CNMV decidiu suspender a cotización de Liberbank en Bolsa e a negociación de títulos de Abanca nos mercados de renda fixa.
Na súa volta á cotización, ás 11.20 horas, os títulos de Liberbank disparábanse un 17,35 %, a maior subida de toda a Bolsa, e así ao longo de toda a sesión ata terminar cunha alza do 19,90 %, ata 0,47 euros.
No lado contrario, Unicaja Banco sufría no mercado cunha caída do 4,20 % polo temor dos investidores a quedar descolgada no seu proceso de fusión ou polo menos pola irrupción de Abanca en plenas negociacións con Liberbank.
Aínda así, Liberbank aclarou que non recibiu ningunha oferta formal de Abanca e os seus plans seguen sendo avanzar na súa unión con Unicaja Banco.
