O exdirector xeral de Caixa Galicia, José Luis Méndez, e o que fora presidente, o avogado lucense Mauro Varela, responderán finalmente por escrito ás preguntas da comisión que investiga no Congreso a crise financeira e a intervención das caixas de aforro. Tras recibir —a petición da deputada de En Marea Yolanda Díaz— os informes médicos cos que ambos certifican padecer graves problemas de saúde que lles impedirían desprazarse a Madrid para someterse ás preguntas dos deputados, os grupos políticos acordaron solicitar que rendan contas sobre o papel.
Tras recibir as cuestións, que lles serán cursadas de aquí ao día 26, dispoñerán de 15 días para responder. A continuación, as formacións poderán replicar.
Como xa avanzou AGN, Méndez, de 72 anos, escusouse a inicios de xaneiro alegando padecer unha enfermidade dexenerativa, en tanto que Varela, de 76, tamén afirmou estar a sufrir un complexo cadro clínico.
Quen si acudirá ao Congreso é Julio Fernández Gayoso, o que fora primeiro espada de Caixanova e copresidente de Novacaixagalicia con Varela. Aínda que nun inicio estaba previsto que os tres comparecesen este martes, a intervención do banqueiro vigués foi aprazada sen data, aínda que a idea é "encaixalo nunha comparecencia de expresidentes de caixas", segundo explicaron fontes da comisión.
Aos seus 86 anos, Gayoso abandonou a prisión da Lama en agosto para colaborar coa fundación Érguete Integración despois de acceder a unha flexibilización do segundo grao no que se atopa a súa condena a dous anos de prisión polas prexubilacións millonarias.
Tamén acudirá o responsable de CIG Banca, Clodomiro Montero, quen abordará a reestruturación das caixas galegas o 7 de marzo. O temporal impediulle voar a Madrid o pasado 16 de xaneiro.
