O número de persoas afiliadas á Seguridade Social en Galicia volveu a superar o millón, con 1.006.499 persoas anotadas, tras un incremento de 8.408 persoas en xuño, un 0,84 % máis, segundo os datos divulgados este martes polo Ministerio de Traballo, Migracións e Seguridade Social.
No último ano, o número de persoas afiliadas á Seguridade Social en Galicia creceu en 26.622 persoas, un 2,72 por cento.
No conxunto de España, a afiliación media á Seguridade Social superou en xuño a barreira dos 19 millóns de ocupados (19.006.990) tras ascender en 91.322 afiliados, o 0,48 por cento; mentres que en termos interanuais xuño pechou cun incremento de 573.884 afiliados medios máis, o 3,11 por cento.
Dos afiliados en Galicia, 771.227 corresponden ao réxime xeral, mentres que 214.277 son autónomos e 20.995 están inscritos no réxime especial do mar.
A afiliación subiu en todas as provincias galegas, especialmente en Pontevedra, tanto con respecto ao mes de maio como no último ano.
