O consello de administración de Prisa ten sobre a mesa unha oferta de compra dos seus medios de comunicación, incluídas cabeceiras emblemáticas como El País ou a Cadena Ser, unha operación que podería elevarse a 200 millóns de euros e sacar de apuros financeiros o grupo, cuxa cotización bolsista se disparou este mércores. Recibida a proposta, convocou unha reunión extraordinaria do consello para este venres para estudala.
Á espera, este xoves o valor das accións de Prisa subiu un 21%, despois de que a CNMV suspendese temporalmente a cotización momentos antes da apertura ao "concorrer circunstancias que puidesen perturbar o normal desenvolvemento das operacións" sobre eses títulos.
O grupo Prisa recibiu a oferta de Blas Herrero, propietario de Kiss Media, que busca facerse con todo o seu negocio de medios de comunicación. Confirmouno á Comisión Nacional do Mercado de Valores (CNMV), que á súa vez fixo un requirimento urxente de información ao empresario asturiano (na foto). "A proposta recibida non foi solicitada por Prisa e, de acordo cos seus propios termos, non é vinculante ata que se cumpran determinadas condicións", precisou o grupo á CNMV.
O consello de administración de Prisa analizará a proposta "e adoptará as medidas oportunas, circunstancia da que dará conta ao mercado cando corresponda, en cumprimento das súas obrigas", indica a compañía.
Prisa subiu un 21% en Bolsa tras recibir a oferta
A oferta, que en principio inclúe tamén os medios de América Latina, segundo confirmaron a Efe fontes próximas á operación, chegoulle este xoves a Prisa por unha carta asinada por Herrero con data do mércores, así como por un correo electrónico.
Na carta detállase que a oferta é "polo conxunto de sociedades e activos que integran actualmente a unidade de negocio de medios de comunicación de Prisa, tanto escritos como radiofónicos e audiovisuais, co que exclúe o negocio de educación", incluída Santillana.
Iso inclúe cabeceiras de diarios como El País, Cinco Días ou As, emisoras como Cadena Ser, Cadena Dial e Los 40, ademais doutras tamén moi populares en América Latina.
A adquisición quérese acometer a través dunha sociedade creada ad hoc (HoldCo) na que un grupo de investidores liderado por Herrero tería unha participación significativa, pero non necesariamente de control. Segundo Herrero, a oferta estaría suxeita a unha due diligence confirmatoria e outras condicións habituais e está pendente de avaliación polo consello de administración de Prisa e, no seu caso, pola xunta xeral de accionistas.
A proposta non foi solicitada polo grupo
O principal accionista de Prisa é Amber Capital co 29,84%. HSBC e Telefónica teñen en torno ao 9% cada un e o Banco Santander un 4%, porcentaxe similar á do empresario mexicano Carlos Slim a través do seu grupo Carso.
Nin Kiss Media, dono de emisoras como Kiss FM ou Hit FM, nin o grupo Prisa facilitaron detalles sobre o importe da operación, que algúns medios sitúan ao redor dos 150 ou 200 millóns.
Fontes próximas a Herrero apuntan que en principio non tería intención de integrar os medios de Prisa cos de Kiss Media, que tamén é propietario de Kiss TV e DKiss TV.
A través de Kiss Media, Herrero conta co que se coñece como family office coa que acomete outros investimentos máis afastados ao mundo da comunicación, que inclúen desde un hotel en Madrid (Barceló Imagine) ata un banco qatarí.
A creación deste grupo empresarial ten a súa orixe na multimillonaria indemnización que Herrero ingresou pola ruptura de contrato que tiña con Onda Cero hai dúas décadas e que implicaba a cesión de decenas de licenzas de emisoras de radio.
No ámbito empresarial tamén é coñecida a intención de Herrero de tomar as rendas de Duro Felguera, que agora está a negociar un rescate público coa Sepi de 100 millóns.
