A cría de visóns para a venda das súas peles no mercado internacional prosegue o seu crecemento en Galicia convertida en imán para investidores estranxeiros que ven un filón neste negocio ante a forte demanda de materia prima para a industria peletera.
Con clientes asegurados e uns prezos que acompañan, a comunidade suma hoxe 34 granxas en activo, seis máis das que operaban fai un lustro, e segue copando practicamente o 80% das explotacións de España.
Unha proba de que a actividade vai a máis e gana adeptos son as tres novas instalacións en execución e a vintena de explotacións que se proxectan para un período de entre dous e cinco anos. Estes datos achégaos a Asociación Galega de Criadores de Visón (Agavi), que dá conta do enorme interese que o sector esperta entre o capital foráneo, máis concretamente europeo, impulsor da maior parte de granxas postas en marcha nos últimos anos.
A comunidade suma hoxe 34 granxas en activo, seis máis das que operaban fai un lustro, e segue copando practicamente o 80% das explotacións de España
Cos seus investimentos contribuíron a elevar unha produción que, a nivel nacional, alcanzou as 750.000 peles de media ao ano nas campañas de 2015 a 2017, ao redor dun 15% máis en sete anos. A maioría comercialízase a través de casas de poxas internacionais especializadas na materia, sobre todo as situadas nas capitais de Finlandia e Dinamarca, mentres un volume "marxinal" véndese a outra que opera en Canadá ou a clientes directos.
COMPETENCIA. De aí chegan aos grandes 'consumidores' nun mercado "en pleno desenvolvemento" pola forte demanda de países como China e Rusia. As peles comercialízanse secas, un proceso que se realiza xeralmente fose da explotación, en centros de peletización desde onde se mandan en caixas ás poxas.
Entre os competidores da pel de visón galega están Dinamarca, Polonia, Holanda ou Finlandia, aínda que en cuestión de calidade os granxeiros da comunidade din ter pouca sombra. A nivel mundial, o maior produtor é China ao copar o 70% da pel, aínda que non destaca pola súa calidade.
¿E canto poden cobrar por cada pel que venden? O prezo medio nos últimos tres anos oscilou entre 35 e 45 euros a unidade. Sobre a súa evolución, conta un granxeiro que as cotizacións se contiveron un pouco tras unha subida "exponencial" que reforzou a rendibilidade das explotacións e o atractivo do sector. "Viviuse case unha burbulla", relata.
¿E canto poden cobrar por cada pel que venden? O prezo medio nos últimos tres anos oscilou entre 35 e 45 euros a unidade
DEBATE SOCIAL. E é que a pel segue de moda a pesar das campañas de presión de grupos animalistas e ecoloxistas contra o acto de matar a un ser vivo para vestir a outro. Máis aló do debate en torno ao sacrificio de animais para fornecer á industria téxtil, desde Agavi defenden que as granxas "fan todo o posible para garantir que a actividade teña un efecto mínimo" sobre o medio ambiente.
"Os nosos produtos de refugallo recíclanse como fertilizantes ou se utilizan na produción de biocombustibles", sinalan, e engaden que tamén se empregan para a fabricación de pensos materias primas de refugallo destinadas ás plantas de cremación, evitando a contaminación de biotoxinas no espazo".
Apelan tamén á contribución das granxas de visóns ao desenvolvemento de zonas rurais, sostendo uns 1.500 postos de traballo directos en toda España, sen contar os de centros de peletización ou fábricas de penso.
Cunha demanda garantida para quen ofreza unha materia prima "de calidade" e a uns prezos "razoables", aos seus 54 anos este produtor quere "dar outro salto e seguir incrementando o negocio" coa ampliación da granxa, na que traballan oito persoas.
Máis aló da cantidade, a calidade é a máxima que lles move, pois as súas peles compiten con outras "de calquera país do mundo" por atopar comprador. No seu caso venden o produto seco a través de casas de poxa en Dinamarca e Finlandia, obtendo uns prezos que "varían moito" en función de parámetros como, por exemplo, a variedade da pel. Este granxeiro foi diversificando e hoxe produce visón negro, marrón, branco e palomino para responder á demanda.
Bermúdez, que foi presidente da Asociación Nacional de Produtores de Visón, destaca a unidade e competitividade do sector. "O noso visón está entre os mellores do mundo!", remarca. E fronte ao debate ético sobre a utilización de peles de animais na industria peletera, alega que "non hai nada máis ecolóxico que a pel natural".
