Artur Yuste: "Queremos promover no rural 300 empregos con Spar Express"

Grupo Cuevas dará un salto na súa expansión en 2020 tras estrear a finais de ano o novo cuartel xeral que constrúe  no polígono ourensán de San Cibrao e cuxos 32.000 metros cadrados concentrarán toda a actividade loxística e de xestión do grupo, fóra de Marron Glacé, a plataforma de vexetais frescos Frunatur e o concesionario Tomóvil. Entre os seus proxectos en curso está a expansión no rural das franquías Spar Express, que xa suman 35 tendas. Cuevas leva catro anos explotando en exclusiva na comunidade a insignia da cadea holandesa. 

¿Que obxectivos se marcan na extensión da rede de Spar Express nas pequenas poboacións?

A alianza estratéxica que establecemos con Spar Española en 2015 supuxo comercializar a marca en Galicia e unha decidida aposta por dinamizar o rural. Para iso concibimos os supermercados Spar Express, que, baixo o formato de franquía, son algo máis que tendas de proximidade. Queremos que sexan tamén  puntos de encontro entre veciños. Ademais de atender as necesidades básicas e o acceso aos produtos, queremos garantir a calidade de vida de quen seguen habitando os pobos. Queremos seguir crecendo e potenciamos a procura de candidatos a desenvolver os seus propios proxectos comerciais. Acompañarémolos incrementando o asesoramento. É un plan focalizado a recuperar modelos de vida capaces de xerar poboacións estables. Volver a vista ao rural é un acerto, pois o noso futuro está nas nosas raíces.

¿Cantos empregos prevén promover coa apertura de cada tenda? ¿Eses establecementos nutriranse de produtos locais?

Despregaremos un amplo paquete de iniciativas de captación, difusión, formación, infraestruturas e investimentos. Os grandes obxectivos do plan, se se cumpre o nivel de máximos previsto, pasan por promover case 300 empregos con diferentes niveis de vinculación, e por orientar unha elevada porcentaxe do volume de negocio a dinamizar as pequenas economías do rural. Este plan estenderá, ademais, a colaboración coas economías locais, posibilitando un maior contacto cos pequenos produtores, emprendedores e profesionais das contornas nos que se implanten as novas tendas.

A castaña é, sen dúbida, a alma de Cuevas e sentímonos orgullosos de levala, a día de hoxe, a máis de 30 países

¿Perciben que coa recuperación o gasto en alimentación remonta?

Non teño moitos datos, pero efectivamente houbo unha activación nas compras dos supermercados desde 2015. Aínda que agora a velocidade de crecemento no gasto está a frearse, segue a tendencia en positivo. No entanto, este non é o noso principal problema, senón o feito de que cada vez somos menos persoas no gasto, e isto é o que debe centrar a nosa atención. A de todos.

Á marxe das aperturas de Spar Express, ¿que plans de expansión teñen para o resto de insignias?

O crecemento de Grupo Cuevas seguiu sempre un proceso natural. Non concibo o crecer por crecer, non me parece un valor. As cifras e os territorios non teñen límites nestes casos, polas súas propias características e volumes. Estamos a actualizar as instalacións dalgúns centros para que a compra dos nosos clientes sexa máis cómoda e fácil. Traballamos a contra reloxo no custoso proxecto da nova central de Grupo Cuevas, que nos permitirá ter máis capacidade e, xa que logo, dar servizo a cada vez máis puntos de venda e clientes finais. Este ano abordaremos un plan intensivo para a remodelación e ampliación de varios supermercados. E preparámonos para acometer en 2020 un dos exercicios de expansión máis ambiciosos na historia do grupo.

Abriron a primeira fábrica de marron glacé nos 70. ¿A cantos países exportan estas delicatessen?

Durante medio século, a esencia do grupo asociouse á castaña galega. Exportamos primeiro o produto fresco a América para atender a demanda do colectivo inmigrante. Logo, introducimos en España un proxecto absolutamente innovador: o marron glacé. A castaña é, sen dúbida, a alma de Cuevas e sentímonos orgullosos de levala a día de hoxe a máis de 30 países dos cinco continentes. é tamén o produto máis entrañable, emocional e íntimo do noso territorio. Levamos anos defendendo sos a calidade e o potencial da castaña, levándoa a todo o mundo, ás mellores tendas gourmet e á alta cociña, dotándoa de prestixio e tratando de crear unha imaxe de marca e unha identidade asociada a Galicia. Agora vemos moitas iniciativas para comercializar este froito, o que proba que non nos equivocamos.  

Os De las Cuevas van pola cuarta xeración á fronte dun grupo con 152 anos. ¿As empresas familiares presentan un plus de resistencia?

Teñen un plus de resiliencia. A súa predisposición a afrontar e superar adversidades está na súa natureza. E o plus de resistencia, diría que é o traballo continuo, facer algo do que te sintas orgulloso. No noso caso, do equipo humano; de crecer ano tras ano en todos os indicadores e do que nos seguimos esixindo para a plena igualdade de homes e mulleres. Tamén o estamos de levar vida ao rural coa apertura de decenas de tendas; de consolidar a contratación indefinida e o emprego feminino; de que xa a metade dos nosos provedores sexan galegos; de que 20.000 familias confíen en nós e de poder axudar a través das tendas a fogares con bebés. Nesta liña, ser o grupo alimentario de máis rápido crecemento en Galicia e crear un modelo de supermercados recoñecido como un dos seis máis innovadores do mundo son outros motivos de orgullo. Se todo isto mide a resistencia, entón si, temos ese plus polo que me pregunta.

¿As empresas deberían implicarse máis nos grandes retos de Galicia, como a demografía?

Un dos principais problemas da caída demográfica é a falta de emprego. Aí é onde xoga un papel esencial a empresa galega e é onde debe estar o noso compromiso. As organizacións empresariais deberían enfocar esforzos e propostas nesta dirección. Iso converteríaas en colectivos máis valorados e máis útiles. O que pedimos á administración e á sociedade en xeral é que non nolo poñan innecesariamente difícil. Canto máis fácil, máis empregos crearemos, evidentemente, dentro da lei e o sentido común.