O salario medio bruto dos españois alcanzou os 1.944,4 euros mensuais en 2018, o que supón un 2,9% máis que en 2017, que é o maior aumento en dez anos. Os datos publicados este venres polo Instituto Nacional de Estadística (INE), a partir de cifras da enquisa de poboación activa, mostran que é o segundo ano consecutivo no que se incrementa, aínda que o repunte non foi compartido por todo o territorio estatal.
Galicia e Navarra foron as dúas únicas comunidades nas que se reduciu o soldo medio, que no caso galego quedou en 1.834,5 euros brutos. Son 35 menos que no exercicio anterior, un descenso que agranda a brecha co media española. Así é que a retribución media da comunidade é case 110 euros inferior á estatal.
Aínda co repunte, o Ine revela que no conxunto de España o 30% dos asalariados (4,8 millóns) gañaron menos de 1.260,9 euros brutos ao mes en 2018. De feito, ao redor de 1,62 millóns de traballadores non alcanzaron os 749.
Mentres, o 40% (6,4 millóns) obtivo remuneracións de entre 1.260,9 e 2.187,2 euros e o 30% restante (4,8 millóns de asalariados) superou os 2.187,2 euros ao mes.
BRECHA DE GÉNERO. Segundo os datos do Ine, as mulleres, os mozos, as persoas cun menor nivel de formación, os traballadores con menor antigüidade nas empresas e os contratados temporalmente presentan os salarios máis baixos.
O soldo medio feminino situouse en 1.708 euros mensuais en 2018, por encima dos 1.668,7 do ano anterior pero aínda moi lonxe dos 2.161 euros dos homes. Estatística apunta entre as razóns que poden explicar a diferenza que as mulleres traballan en maior proporción que os homes en empregos a tempo parcial, con contratos temporais, e en ramas de actividade peor remuneradas.
