O turoperador británico Thomas Cook, en suspensión de pagos, emprega a unhas 2.500 persoas de forma directa en España —a maioría en Canarias e Baleares— onde conta con máis de 12.000 habitacións no medio centenar de hoteis de oito marcas e onde trae cada ano a 4 millóns de turistas. Segundo unha información da compañía datada o pasado mes de xuño e na que expuña os seus plans para investir 40 millóns de euros en España ata 2020, de eses 2.500 traballadores, 650 están a oficina que inaugurou en 2018 en Palma de Mallorca.
Xunto ao emprego directo de Thomas Cook en España, desde os sindicatos advirten do dano que pode causar a quebra a todo o emprego do sector, fundamentalmente en Canarias e Baleares, onde moitas prazas xa estaban reservadas para o turoperador. Segundo UXT, a quebra da empresa podería facer perigar o 10% de todos os postos do traballo do sector hostaleiro en Canarias, unhas 12.000 persoas.
Ante esta situación, os sindicatos pediron ao Goberno unha reunión na que estean tamén empresarios e responsables das comunidades autónomas para facer unha análise conxunto e buscar solucións que eviten esta destrución de emprego. A compañía recordaba en xuño que, cada ano, traía uns 4 millóns de turistas de 15 países diferentes a España, un dos mercados favoritos dos seus clientes polo que quería seguir apostando nunha contorna máis competitiva, modernizando instalacións.
As comunidades piden a Turismo incentivos fiscais e axudas ao sector tras a quebra de Thomas Cook
Así, ese plan de investimento -que presentou en Mallorca o director executivo, Peter Fankhauser- buscaba renovar 10 hoteis de marca propia en España entre os que sinalaba Casa Cook en Eivissa, Sunwing Arguineguin en Gran Canaria, Sunwing Fanabe en Tenerife, Cala'n Bosch en Menorca, Sunwing Alcudia e Sentido Cala Vinas, en Mallorca.
No comunicado, a empresa recordaba tamén a "joint venture" de investimento selado con LMEY e que recibiu financiamento, entre outros, de CaixaBank con 51 millóns de euros ou o grego Piraeus Bank, con 40 millóns. Desde a entidade española sinalan que se trata dun crédito apoiado por hoteis de boa calidade.
Na presentación deste plan para España, Fankhauser mostrou a súa confianza na marcha do mercado español e de Thomas Cook tras a última inxección de liquidez que recibira, aínda que sinalaba as dificultades que afrontaba ante a competencia online e a incerteza en Reino Unido.
Uns meses antes, en marzo, a empresa tamén advertía nunha presentación a analistas de que as reservas para Canarias e Baleares de cara a este verán eran máis frouxas, nun contexto de recuperación doutros mercados como Turquía, Exipto ou Tunisia e da incerteza asociada ao brexit.
Thomas Cook, con 178 anos de historia, emprega a 20.000 traballadores en todo o mundo —9.000 no Reino Unido— e anualmente ofrece servizos a 19 millóns de persoas en 16 países. A quebra afectou a 600.000 turistas
COMUNIDADES. Os Gobernos de distintas autonomías pediron este martes ao Ministerio de Turismo que estude a aprobación de axudas e incentivos fiscais para as empresas do sector, especialmente hostaleiras, afectadas pola quebra do operador de turismo. O ministerio reuniuse coas consellerías do ramo en Madrid para abordar a situación.
Por parte de Canarias, a conselleira de Turismo, Yaiza Castela, recordou que a empresa que pechou supón máis do 12 por cento das conexións do arquipélago polo que as illas afrontan a súa "maior crise turística".
