viernes. 25.09.2020 |
El tiempo
viernes. 25.09.2020
El tiempo

Urxen o Sepe a abonar o subsidio a empregadas de fogar afectadas pola crise

Empregada de fogar. PIXABAY
Empregada de fogar. PIXABAY
UXT remite unha carta ao Goberno ante o atraso nos pagos da axuda, aprobada en marzo. Pide coñecer o número de beneficiarias e solicitantes

UXT urxe ao Goberno a poñerse as pilas ante o atraso no abono do subsidio extraordinario deseñado para as traballadoras de fogar que perderon os seus contratos ou viron reducida a súa actividade pola pandemia. A pesar de que o Goberno anunciou a inicios de xullo que o Servizo Público de Emprego Estatal (Sepe) comezaría ese mes a ingresar a axuda que o Consello de Ministros aprobou a finais de marzo, o sindicato chama a resolver "canto antes o atraso" na xestión desta cobertura. 

Para iso, a central enviou unha carta ao director xeral do Sepe, Gerardo Gutiérrez, na que mostra "a preocupación" de UXT pola dilación na resposta ás solicitudes e no ingreso das contías correspondentes.

Para poder trazar unha radiografía do sector e das condicións de traballo dun colectivo que, en xullo, contaba en Galicia con 25.023 afiliados, 374.495 en España, o sindicato tamén reclama que se publiquen os datos referentes ao número de solicitantes e beneficiarios desta cobertura. Segundo a Epa, que cifra en 483.000 os ocupados no sector ao peche do segundo trimestre —o que dá unha idea da envergadura do emprego mergullado—, desde inicios de ano perdéronse 97.500 postos. 

UXT pide conformar unha mesa de Diálogo Social para mellorar a situación dunhas profesionais que non cotizan polo paro e están expostas a condicións "precarias"

A central incide en que o 5 de setembro "cumpriranse tres meses" da apertura do prazo de solicitude e recalca que o colectivo, integrado na súa maioría por mulleres —estranxeiras nun 40%—, está suxeito a "condicións precarias" e soldos "baixos". Por iso, demanda formar, "con carácter urxente" unha mesa de Diálogo Social para mellorar a situación dunhas profesionais, que non cotizan polo paro. 

As bases da prestación estipulan que cobre tanto a quen quedou sen emprego tras o 14 de marzo como a quen viu reducidas as súas horas de traballo. Sempre que, en conxunto, os seus ingresos non superen o SMI, de 950 euros mensuais, a axuda —equivalente ao 70% da base reguladora— será compatible con outras actividades. No entanto, está vetada ás profesionais que cobren a prestación por incapacidade temporal e ás que gozasen do permiso retribuído recuperable.

Para solicitala, a persoa interesada debía achegar unha declaración responsable do seu ou os seus empregadores. En canto á súa duración, a cobertura estendeuse desde a data en que o empregador dese de baixa a traballadora, reducise ou suspendese a súa xornada ata un mes despois do fin do estado de alarma, isto é, o 21 de xullo.

Urxen o Sepe a abonar o subsidio a empregadas de fogar afectadas...
comentarios